കൊല്ലപ്പെട്ട പാര്‍ട്ടി പ്രവര്‍ത്തകരുടെ കുടുംബാംഗങ്ങളെ തന്റെ സത്യപ്രതിജ്ഞ ചടങ്ങിലേക്ക് ക്ഷണിച്ച് നരേന്ദ്ര മോദി

പശ്ചിമ ബംഗാളിലെ തെരഞ്ഞെടുപ്പ് അക്രമങ്ങള്‍ക്കിടെ കൊല്ലപ്പെട്ട50 ബി.ജെ.പി പ്രവര്‍ത്തകരുടെ ബന്ധുക്കളെ മോദിയുടെ സത്യപ്രതിജ്ഞാ ചടങ്ങിലേക്ക് ക്ഷണിച്ച് ബി.ജെ.പി നേതൃത്വം.

കഴിഞ്ഞ ആറ് വര്‍ഷത്തിനിടെ പഞ്ചായത്ത് തെരഞ്ഞെടുപ്പിലും ലോക്സഭാ തെരഞ്ഞെടുപ്പിനും ഇടയില്‍ നടന്ന അക്രമങ്ങളില്‍ 51 ബി.ജെ.പി പ്രവര്‍ത്തകര്‍ കൊല്ലപ്പെട്ടിട്ടുണ്ടെന്നാണ് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നത്.

ചടങ്ങിലേക്ക് തങ്ങളെ ക്ഷണിച്ച ബി.ജെ.പി നേതൃത്വത്തോട് നന്ദിയുണ്ടെന്നും ഡല്‍ഹിയില്‍ എത്തി ചടങ്ങ് നേരിട്ട് കാണാന്‍ അവസരം ലഭിച്ചതില്‍ സന്തോഷമുണ്ടെന്നും കൊല്ലപ്പെട്ട ബി.ജെ.പി പ്രവര്‍ത്തകന്‍ മനു ഹന്‍സയുടെ മകന്‍ പറഞ്ഞു.

7000 പേര്‍ക്കാണ് രാഷ്ട്രപതി ഭവനില്‍ നടക്കുന്ന ചടങ്ങിലേക്ക് ക്ഷണം ലഭിച്ചത്. പശ്ചിമബംഗാളില്‍ 42 ല്‍ 18 സീറ്റുകള്‍ നേടിയാണ് ബി.ജെ.പി വലിയ തിരിച്ചുവരവ് നടത്തിയത്.

തെരഞ്ഞെടുപ്പ് തിരിച്ചടിക്ക് പിന്നാലെ തൃണമൂലിലെ 50 കൗണ്‍സിലര്‍മാരും രണ്ട് എം.എല്‍.എമാരും ബി.ജെ.പിയില്‍ ചേര്‍ന്നിരുന്നു. എന്നാല്‍ തങ്ങളുടെ എം.എല്‍.എമാരെ തോക്കിന്‍മുനയില്‍ നിര്‍ത്തിയാണ് ബി.ജെ.പി അവരുടെ പക്ഷത്ത് ചേര്‍ത്തത് എന്നായിരുന്നു മമത ബാനര്‍ജിയുടെ പ്രതികരണം.