ഫോൺ തകർക്കും, സെൽഫി എടുക്കാനെത്തിയ ആരാധകരോട് കയർത്ത് നയൻതാര

ഏറെ ആരാധകരുള്ള താരദമ്പതിമാരാണ് നയൻതാരയും വിഘ്‌നേഷ് ശിവനും. ജീവിതത്തിലെ പ്രിയനിമിഷങ്ങൾ താരങ്ങൾ ആരാധകരുമായി പങ്കുവെയ്ക്കാറുണ്ട്. വാടക ഗർഭധാരണത്തിലൂടെ ഇരട്ടക്കുട്ടികളുടെ മാതാപിതാക്കളായ വിഘ്‌നേഷ് ശിവനും നയൻതാരയും മക്കളെ ഉയിർ, ഉലക് എന്നീ ഓമന പേരുകളിലാണ് ആരാധകർക്ക് പരിചയപ്പെടുത്തിയിരുന്നത്.

നയൻതാര ക്ഷേത്ര സന്ദർശനത്തിന് എത്തിയപ്പോൾ നടന്നൊരു സംഭവമാണ് ഇപ്പോൾ സോഷ്യൽ മീഡിയയിൽ വൈറലാവുന്നത്. ക്ഷേത്ര ദർശനത്തിനിടെ തന്നെ വളഞ്ഞ ആരാധകരോട് നയൻതാര ദേഷ്യപ്പെട്ടിരിക്കുകയാണ്. ഭർത്താവ് വിഘ്‌നേഷ് ശിവനൊപ്പമാണ് കഴിഞ്ഞ ദിവസം കുംഭകോണത്തിന് അടുത്ത മേലവത്തൂർ ഗ്രാമത്തിലെ പുഴയോരത്തെ കാമാച്ചി അമ്മൻ ക്ഷേത്രം നയൻതാര സന്ദർശിച്ചത്.

നടി വരുന്നുണ്ടെന്ന് അറിഞ്ഞ് താരത്തെ കാണാനായി നിരവധി ആരാധകരാണ് തടിച്ചുകൂടിയത്. ഇതോടെ ശാന്തമായി ദർശനം നടത്താൻ പോലും നയൻതാരയ്ക്ക് കഴിഞ്ഞിരുന്നില്ല. അമ്മൻ ക്ഷേത്രത്തിലെ പൂജകൾ പൂർത്തിയാക്കിയ ശേഷം ഇരുവരും അടുത്തുള്ള മറ്റൊരു ക്ഷേത്രത്തിലേക്ക് പോയി.

ഇതിനിടെ താരത്തിനൊപ്പം സെൽഫി എടുക്കവെ ആരാധകരിൽ ഒരാൾ നയൻതാരയുടെ തോളിൽ പിടിച്ചിരുന്നു. അവരുടെ കൈ തട്ടി മാറ്റുന്നതും ദേഷ്യത്തോടെ സംസാരിക്കുന്നതിന്റെയും വീഡിയോ സോഷ്യൽ മീഡിയയിൽ വൈറലായിരിക്കുകയാണ്. ശേഷം റെയിൽവേ സ്റ്റേഷനിലേക്ക് പോയി ട്രെയ്ൻ കയറിയ നടിയെ പിന്തുടർന്ന് ആരാധകരും പാപ്പരാസികളും എത്തി. വിടാതെ തന്നെ പിന്തുടരുന്ന ക്യാമറകണ്ണുകൾ കണ്ട് നയൻതാര വീണ്ടും ദേഷ്യപ്പെട്ടു. വീഡിയോ പകർത്തിയ ഒരാളോട് ഫോട്ടോ എടുത്താൽ താൻ സെൽഫോൺ തകർക്കുമെന്നും നയൻതാര വാണിങ് നൽകി.

ക്ഷേത്ര ദർശനത്തിൽ അനുഭവപ്പെട്ട പിരിമുറുക്കവും ജനത്തിരക്ക് കാരണവുമായിരിക്കാം നയൻതാരയ്ക്ക് ദേഷ്യം വന്നതെന്നാണ് സോഷ്യൽ മീഡിയയിൽ വരുന്ന കമന്റുകൾ. ആരാധന കൊണ്ട് പിന്നാലെ കൂടിയവരോട് ദേഷ്യപ്പെട്ടത് ശരിയായില്ല എന്നും ചിലർ അഭിപ്രായപ്പെടുന്നുണ്ട്.