സർക്കാരിന്റെ ജനദ്രോഹ നയങ്ങൾക്കെതിരെ എൻഡിഎയുടെ സെക്രട്ടറിയേറ്റ് മാർച്ച്

തിരുവനന്തപുരം: സംസ്ഥാനസർക്കാരിന്റെ ജനദ്രോഹ നടപടികൾക്കെതിരെ എൻഡിഎയുടെ സെക്രട്ടറിയേറ്റ് മാർച്ച് ഇന്ന് നടക്കും. മാർച്ച് ദേശീയ ജനാധിപത്യ സഖ്യം കേരള ഘടകം ചെയർമാൻ കെ. സുരേന്ദ്രൻ ഉദ്ഘാടനം ചെയ്യും. അതേസമയം ജനങ്ങളെ കട്ടുമുടിച്ചുകൊണ്ടുള്ള പിണറായി സർക്കാരിന്റെ അഴിമതിക്കെതിരായ ബഹുജനപ്രക്ഷോഭത്തിന്റെ തുടക്കമായിരിക്കും ഈ സെക്രട്ടറിയേറ്റ് മാർച്ചെന്ന് ബിജെപി ദേശീയ നിർവാഹക സമിതി അംഗം പികെ കൃഷ്ണദാസ് പ്രതികരിച്ചു.

വയനാട്ടിൽ തിരഞ്ഞെടുപ്പ് വന്നാൽ ഇരുമുന്നണികളുടേയും സംയുക്ത സ്ഥാനാർത്ഥി വരും. നിയമസഭയിൽ പ്രതിപക്ഷമില്ലാത്ത അവസ്ഥയാണ് കേരളത്തിലുള്ളത്. തെരുവിൽ എൻഡിഎ പ്രതിപക്ഷ ശബ്ദമാവുമെന്നും പികെ കൃഷ്ണദാസ് വ്യക്തമാക്കി. പിണറായി സർക്കാരിന്റെ ജനദ്രോഹനയങ്ങൾക്കെതിരെയുള്ള പ്രതിഷേധമാണ് മതപുരോഹിതൻമാർ പോലും ഭരണപക്ഷത്തിനെതിരെ രംഗത്തെത്തിയത്.

തലശ്ശേരി ബിഷപ്പിന്റെ അഭിപ്രായം പൊതു വികാരമാണ്. ഇനിയും സിപിഎമ്മിന്റെ ഭീഷണിക്ക് മുമ്പിൽ മുട്ടുമടക്കാൻ തയ്യാറല്ലെന്നാണ് റബർ കർഷകർ പറയുന്നത്. താമരശ്ശേരി ബിഷപ്പും തലശ്ശേരി ബിഷപ്പിനെ അനുകൂലിച്ച് രംഗത്ത് വന്നത് ഇതിന്റെ സൂചനയാണ്. ഇത് എല്ലാ വിഭാഗം ജനങ്ങളുടേയും അഭിപ്രായമാണ്. കേരളത്തിൽ കേന്ദ്ര സർക്കാരിന്റെ പദ്ധതികളല്ലാതെ ഒന്നും നടക്കുന്നില്ലയെന്നും അദ്ദേഹം പറഞ്ഞു.