ബെംഗളൂരു കഫേ സ്‌ഫോടനക്കേസ്, അഞ്ചാം പ്രതിയെയും പിടികൂടി എൻഐഎ

മാർച്ച് ഒന്നിന് ബെംഗളൂരുവിലെ രാമേശ്വരം കഫേയിൽ നടന്ന സ്‌ഫോടനത്തിൽ അഞ്ചാം പ്രതിയേയും ദേശീയ അന്വേഷണ ഏജൻസി (എൻഐഎ) അറസ്റ്റ് ചെയ്തു. 35 കാരനായ കർണ്ണാടകയിലെ ഹുബ്ബാലി സ്വദേശി ഷൊയ്ബ് അഹമ്മദ് മിർസ എന്ന ഛോട്ടുവിനെയാണ് അറസ്റ്റ് ചെയ്തത്. ഇയാൾ മുമ്പ് ലഷ്കർ-ഇ-തൊയ്ബ ഭീകര ഗൂഢാലോചന കേസിൽ ശിക്ഷിക്കപ്പെട്ടയാളാണ്.

ജയിൽ മോചിതനായതിന് ശേഷമാണ് മിർസ പുതിയ ഗൂഢാലോചനയിൽ പങ്കാളിയായതെന്നും ഏജൻസി പറഞ്ഞു. 2018ൽ ഇയാൾ പ്രതി അബ്ദുൾ മത്തീൻ താഹയുമായി സൗഹൃദം സ്ഥാപിക്കുകയും വിദേശത്തുണ്ടെന്ന് സംശയിക്കുന്ന ഓൺലൈൻ ഹാൻഡ്‌ലറെ പരിചയപ്പെടുത്തുകയും ചെയ്‌തിരുന്നു.

ഏപ്രിൽ 12 ന് കൊൽക്കത്തയിലെ തന്റെ ഒളിത്താവളത്തിൽ നിന്ന് സഹപ്രതി മുസ്സാവിർ ഹുസൈൻ ഷാസിബിനൊപ്പം അറസ്റ്റിലായ അബ്ദുൾ മത്തീൻ താഹയും ഹാൻഡ്‌ലറും തമ്മിലുള്ള എൻക്രിപ്റ്റ് ചെയ്ത ആശയവിനിമയത്തിനായി മിർസ ഒരു ഇ-മെയിൽ ഐഡിയും നൽകിയിരുന്നു. രാമേശ്വരം കഫേ സ്‌ഫോടനക്കേസിലെ പ്രതികളെ പിടികൂടുന്നതിനായി എൻഐഎ ഇന്ത്യയുടെ 29 സ്ഥലങ്ങളിൽ വ്യാപകമായ തിരച്ചിൽ നടത്തിയിരുന്നു.

നിരവധി പേർക്ക് പരിക്കേൽക്കുകയും വസ്തുവകകൾക്ക് വൻ നാശനഷ്ടം വരുത്തുകയും ചെയ്ത സ്ഫോടനത്തിന് പിന്നിലെ വലിയ ഗൂഢാലോചനയും ഹാൻഡ്ലറുടെ പങ്കും അന്വേഷിക്കാൻ കൂടുതൽ അന്വേഷണം നടക്കുന്നുണ്ട്. കേസുമായി ബന്ധപ്പെട്ട് എൻഐഎ വിവിധ സംസ്ഥാനങ്ങളിൽ റെയ്ഡ് നടത്തി രണ്ട് ദിവസത്തിന് ശേഷമാണ് അറസ്റ്റ്. മാർച്ച് 3-ന് കേസ് ഏറ്റെടുത്ത അന്വേഷണ ഏജൻസി ഏപ്രിൽ 12 ന് വിഷയത്തിൽ മുഖ്യ സൂത്രധാരൻ അദ്ബുൽ മത്തീൻ അഹമ്മദ് താഹ ഉൾപ്പെടെ രണ്ട് പ്രധാന പ്രതികളെ അറസ്റ്റ് ചെയ്തിരുന്നു.