മകളെ കാണാതെ യാത്രയായ നിതിന് വിടചൊല്ലി പ്രിയതമയും നാടും, വികാര നിർഭരമായ നിമിഷങ്ങൾ

മകളെ ഒരു നോക്കുപോലും കാണാതെ യാത്രയായ നിതിന്റെ മൃതദേഹം വീട്ടുവളപ്പിൽ സംസ്ക്കരിച്ചു. വളരെ വികാരനിർഭരമായ രം​ഗങ്ങളാണ് വീട്ടുവളപ്പിൽ‌ അരങ്ങേറിയത്. നിരവധി ആളുകൾ തടിച്ച്കൂടിയെങ്കിലും അടുത്ത കുടുംബാം​ഗങ്ങൾക്ക് മാത്രമാണ് നിതിനെ അവസാനമായി ഒരുനോക്ക് കാണാനായത്.

നിതിന്റെ മൃതദേഹവുമായി ആംബുലൻസ് നെടുമ്പാശ്ശേരിയിൽനിന്ന് നേരെ പോയത് കോഴിക്കോട് ആശുപത്രിയിലേക്കായിരുന്നു. അവിടെ ഒരു അന്ത്യചുംബനം പോലും കാണാനാകാതെ ആതിരെ ഒരു മിനിറ്റ് മാത്രം തന്റെ പ്രിയതമനെ അവസാനമായി കണ്ടു. ആംബുലൻസ് എത്തുന്നതിന് കുറച്ചുസമയം മുന്നേയാണ് പ്രിയപ്പെട്ടവന്റെ വിയോഗ വാർത്ത ആതിരയെ അറിയിച്ചത്. കാത്തിരുന്ന കൺമണിയെ കാണാതെ പോയ പ്രിയപെട്ടവനെ ഒന്നുകാണുവാനായി വീൽചെയറിലാണ് ആതിരയെ ആംബുലൻസിനടുത്തെത്തിച്ചത്. നിതിന്റെ വേർപ്പാടറിയാതെ ആതിര ഇന്നലെയാണ് പെൺകുഞ്ഞിനെ പ്രസവിച്ചത്.

ആശുപത്രിയിൽനിന്ന് നിതിന്റെ മൃതദേഹം പേരാമ്പ്രയിലുള്ള വീട്ടിലെത്തിച്ചു. ഒരുമണിയോടെ വീട്ടുവളപ്പിൽ സംസ്ക്കരിച്ചു. പുലര്ച്ചെ അഞ്ചിനാണ് ദുബായില് നിന്ന് മൃതദേഹം എത്തിച്ചത്. എയര് ആറേബ്യയുടെ പ്രത്യേക വിമാനത്തിലാണ് മൃതദേഹം കൊച്ചിയിലെത്തിച്ചത്. തിങ്കളാഴ്ചയാണ് ദുബായില് ഹൃദയാഘാതം മൂലം നിതിന് ദുബായില് മരിച്ചത്.