സിനിമക്കായി ജോലി ഉപേക്ഷിക്കാൻ കാണിച്ച ധൈര്യമാണ് പിന്നിട്ട വഴികളിൽ ഏറ്റവും ധീരമായി തോന്നുന്നത്- നിവിൻ പോളി

മലയാള സിനിമയിൽ യുവ താരനിരയിൽ ശ്രദ്ധേയമായ സ്ഥാനം പിടിച്ച താരമാണ് നിവിൻ പോളി. തന്റേതായ അഭിനയ ശൈലി തന്നെയാണ് താരത്തിന്റെ ഏറ്റവും വലിയ പ്രത്യേകത. അഭിനയ ജീവിതത്തിൽ പത്ത് വർഷം പൂർത്തിയാക്കിയ നിവിൻ പോളിയുടെ പേരിൽ പ്രേമം, ആക്ഷൻ ഹീറോ ബിജു, ബാം​ഗ്ലൂർ ഡെയ്സ് തുടങ്ങിയ നിരവധി ഹിറ്റ് ചിത്രങ്ങളാണുള്ളത്. ഇപ്പോളിതാ സിനിമയിലേക്കെത്തപ്പെട്ടതിനെക്കുറിച്ച് തുറന്നുപറയുകയാണ് താരം.

സിനിമ ഭ്രാന്ത് തലയ്ക്കുപിടിച്ച് ജോലി ഉപേക്ഷിച്ചെത്തിയ തന്നെ പലരും പരിഹാസത്തോടെയാണ് കണ്ടതെന്നും എന്നാൽ ജോലി ഉപേക്ഷിച്ചതാണ് തന്റെ ജീവിതത്തിലെ ഏറ്റവും ധീരതയേറിയ തീരുമാനമെന്നും നിവിൻ പറഞ്ഞു. ജീവിതത്തിന്റെ നിർണായക സന്ദർഭങ്ങളിൽ നമ്മൾ കൈക്കൊള്ളുന്ന ചില തീരുമാനങ്ങളാകും നമ്മുടെ ജീവിതത്തെ മാറ്റിമറിക്കുക. സിനിമയെന്ന സ്വപ്നത്തിനായി ജോലി ഉപേക്ഷിക്കാൻ കാണിച്ച ധൈര്യമാണ് പിന്നിട്ട വഴികളിൽ ഏറ്റവും ധീരമായി തോന്നുന്നത്. ഒരു കാര്യത്തിന് ഇറങ്ങിത്തിരിക്കും മുമ്പ് പലതരത്തിലുള്ള അഭിപ്രായങ്ങൾ ചുറ്റും ഉയരുന്നത് സ്വാഭാവികമാണ്. അവയ്ക്കു ചെവികൊടുത്ത് നീങ്ങാൻ തുടങ്ങിയാൽ അതിനു മാത്രമേ നേരം കാണൂ, മനസ്സ് തീവ്രമായി ആഗ്രഹിക്കുന്ന കാര്യങ്ങൾ ചെയ്യുക, നഷ്ടങ്ങളെ കുറിച്ചോർത്ത് പിൻതിരിഞ്ഞാൽ വലിയ വിജയങ്ങൾ സാധ്യമായെന്നു വരില്ല. നിവിൻ പറഞ്ഞു.

രാജീവ് രവി സംവിധാനം ചെയ്യുന്ന തുറമുഖമാണ് നിവിന്റെ പ്രദർശനത്തിനെത്തുന്ന അടുത്ത ചിത്രം. തീയറ്റർ റിലീസ് കണക്കാക്കി ഒരുക്കിയതാണ് ചിത്രമെന്നും ശേഷം ചാനലിനും ഒ.ടി.ടി പ്ലാറ്റ്‌ഫോമിനും നൽകുമെന്നും നിവിൻ പോളി കൂട്ടിച്ചേർത്തു.