മന്ത്രി കസേരയോ മറ്റു പദവികളോ കിട്ടുമെന്ന് കരുതി ജനങ്ങളെ വഞ്ചിക്കാൻ തയ്യാറല്ല – കെ.ബി.ഗണേഷ്കുമാര്‍ എംഎല്‍എ

തിരുവനന്തപുരം. മന്ത്രി കസേരയോ മറ്റു പദവികളോ കിട്ടുമെന്ന് കരുതി പാർട്ടി നേതാക്കളെയോ ജനങ്ങളെയോ വഞ്ചിക്കാൻ താൻ തയ്യാറല്ലെന്ന വിവാദ പ്രസ്താവനയുമായി കെ.ബി.ഗണേഷ്കുമാര്‍ എംഎല്‍എ. ഇടതുമുന്നണിക്കെതിരെ പരസ്യവിമര്‍ശനമാണ് കെ.ബി.ഗണേഷ്കുമാര്‍ എംഎല്‍എ മനസ്സ് തുറന്നു പറഞ്ഞിരിക്കുന്നത്. ‘എനിക്ക് മന്ത്രിസ്ഥാനമോ മറ്റ് പദവികളോ ലഭിക്കുമെന്ന് കരുതി കൂടെയുള്ള പാർട്ടി നേതാക്കളെയോ ജനങ്ങളെയോ വഞ്ചിച്ചുകൊണ്ട് ഒരിക്കലും ഞാൻ പ്രവർത്തിക്കില്ല. എനിക്ക് ഒരു സ്ഥാനവും വേണ്ട.’– ഗണേഷ് പറഞ്ഞു.

മുന്നണിയില്‍ ആരോഗ്യപരമായ കൂടിയാലോചനകളില്ല. വികസനരേഖയില്‍ ചര്‍ച്ചയുണ്ടായില്ല. പങ്കെടുക്കുന്നവരുടെ തിരക്കാകാം ഇതിനൊക്കെ കാരണമെന്നും ഗണേഷ് കുമാറിന്റെ പരിഹാസം. കഴിഞ്ഞ വർഷത്തെ ബജറ്റിൽ പറഞ്ഞ പല കാര്യങ്ങളും നടപ്പിലാക്കാത്തതിൽ സർക്കാരിനോടും ഇടതുപക്ഷത്തോടുമുള്ള അതൃപ്തിയും പ്രതിഷേധവുമാണ് ഗണേഷ് കുമാർ തുറന്നടിച്ചിരിക്കുന്നത്.

റോഡുകളുടെ അറ്റകുറ്റപ്പണികൾ തീരാത്തതിനാൽ മണ്ഡലങ്ങളിൽ എംഎൽഎമാർക്ക് പോകാൻ സാധിക്കാത്ത സ്ഥിതി. വികസനരേഖയിൽ ചർച്ചയുണ്ടായില്ല, അഭിപ്രായം മാത്രമാണ് തേടിയത്. ഇക്കാര്യങ്ങൾ തുറന്നുപറയാൻ ഒരു മടിയുമില്ല. പത്തനാപുരത്തെ ജനങ്ങൾ വോട്ട് ചെയ്യുന്നതുകൊണ്ടാണ് ഞാൻ നിയമസഭയിലേക്ക് വരുന്നത്. അവിടെ എൽഡിഎഫിനും യുഡിഎഫിനും വേണ്ടി മത്സരിച്ചിട്ടുണ്ട് – ഗണേഷ് കുമാർ പറഞ്ഞു.