തടവുകാരെ കുത്തിനിറച്ച് വിയ്യൂര്‍ ജയിലില്‍ ; ഏറ്റുമുട്ടല്‍ തുടര്‍ക്കഥയാകുന്നു

തൃശ്ശൂര്‍ : വിയ്യൂര്‍ ജയിലില്‍ തടവുകാരെ കുത്തിനിറക്കുന്നു. 560 പേരെ പാര്‍പ്പിക്കാന്‍ ശേഷിയുള്ള ജയിലിലിപ്പോള്‍ തടവുകാരുടെ എണ്ണം 950 ആണ്. ജീവനക്കാരാകട്ടെ, 45 ശതമാനം കുറവുമാണ്. ഇത്രയും തടവുകാരെ നോക്കാനുള്ള ജീവനക്കാരും ഇല്ല. തടവുകാര്‍ തമ്മിലുള്ള ഏറ്റുമുട്ടല്‍ നിത്യ സംഭവമാകുകയാണ്.
ജയില്‍വകുപ്പിന്റെ പുതിയ നിര്‍ദേശപ്രകാരം അതത് മേഖലകളിലെ ഗുണ്ടാ തടവുകാരെ അവരുടെ മേഖലയിലെ ജയിലുകളില്‍ പാര്‍പ്പിക്കാന്‍ പാടില്ല. അതുപ്രകാരം കണ്ണൂര്‍, തിരുവനന്തപുരം എന്നിവിടങ്ങളിലെ സെന്‍ട്രല്‍ ജയിലുകളിലെ തദ്ദേശതടവുകാരെ വിയ്യൂര്‍ ജയിലിലേക്കാണ് മാറ്റുന്നത്.

ഇതാണ് വിയ്യൂര്‍ ജയിലില്‍ ഗുണ്ടാ തടവുകാര്‍ വര്‍ധിക്കുന്നതിന് കാരണമാകുന്നുണ്ട്. നിലവിലുള്ള 950 തടവുകാരില്‍ നൂറിലേറെപ്പേര്‍ ഗുണ്ടാ തടവുകാരാണ്. ഇവരും സാധാരണ തടവുകാരും തമ്മിലുള്ള ഏറ്റുമുട്ടല്‍ പതിവാണ്. ഇതു കാരണം ജയിലില്‍ തടവുകാരുടെ വിവിധ സംഘങ്ങളും രൂപപ്പെട്ടിട്ടുണ്ട്. ജീവനക്കാരും ഇവരെ നിയന്ത്രിക്കാൻ പെടാപ്പാട്പ്പെടുന്നു.

ജയില്‍ നിയമപ്രകാരം ആറ് തടവുകാര്‍ക്ക് ഒരു ഉദ്യോഗസ്ഥന്‍ വീതം വേണം. എന്നാല്‍, വിയ്യൂര്‍ ജയിലില്‍ ഇപ്പോള്‍ 12 പേര്‍ക്ക് ഒരു ഉദ്യോഗസ്ഥന്‍ പോലുമില്ലാത്ത സ്ഥിതിയാണ്. ജയിലുകളില്‍ താത്കാലിക സര്‍വീസിനായി കെക്സ്‌കോണ്‍ വഴി വിമുക്തഭടന്മാരെ അസിസ്റ്റന്റ് പ്രിസണ്‍ ഓഫീസര്‍മാരായി നിയമിച്ചിരുന്നത് നിര്‍ത്തലാക്കിയതും വിയ്യൂര്‍ ജയിലില്‍ വലിയ തിരിച്ചടിയായി. ജയില്‍ വകുപ്പിലേക്ക് നിയമിക്കപ്പെടുന്നവര്‍ ജോലിസമ്മര്‍ദ്ദം കാരണം ജോലി ഉപേക്ഷിച്ചു പോകുന്ന അവസ്ഥയാണ് മിക്കപ്പോഴും ഉണ്ടാകുന്നത്. കൊടുംകുറ്റവാളികളെ കൈകാരയം ചെയ്യാനുള്ള പരിശീലനം ജീവനക്കാർക്ക് നൽകേണ്ടതുമുണ്ട്.