10 വർഷമായി രാജ്യത്ത് മികച്ച ഭരണം, മോദിയെ പിന്തുണയ്ക്കുന്നുവെന്ന് ഒ. പനീർസെൽവം, ബിജെപിയുമായി സഖ്യചർച്ചകൾ പുരോഗമിക്കുന്നു

ന്യൂഡൽഹി : രാജ്യത്ത് കഴിഞ്ഞ 10 വർഷമായി മികച്ച ഭരണമാണ് നടക്കുന്നതെന്ന് തമിഴ്‌നാട് മുൻമുഖ്യമന്ത്രി ഒ. പനീർസെൽവം. പ്രധാനമന്ത്രി നരേന്ദ്രമോദിയെ പിന്തുണച്ച അദ്ദേഹം ബിജെപിയുമായി സഖ്യ ചർച്ചകൾ പുരോഗമിക്കുകയാണെന്നും അദ്ദേഹം പറഞ്ഞു. 2024 തിരഞ്ഞെടുപ്പ് ഇരുപാർട്ടികളും ഒന്നിച്ച് നേരിടണമെന്നാണ് തന്റെ അഭിപ്രായമെന്നും പനീർസെൽവം പറഞ്ഞു.

2019 തിരഞ്ഞെടുപ്പ് മുതൽ ഞങ്ങൾ ബിജെപിയുമായി സഖ്യത്തിലാണ്. കഴിഞ്ഞ 10 വർഷമായി പ്രധാനമന്ത്രി രാജ്യത്ത് മികച്ച ഭരണമാണ് കാഴ്ചവക്കുന്നത്. നിരവധി രാജ്യങ്ങൾ, രാഷ്‌ട്രത്തലവന്മാർ അദ്ദേഹത്തെ പ്രശംസിക്കുകയാണ്. നരേന്ദ്രമോദിയെ പിന്തുണയ്‌ക്കേണ്ടത് തങ്ങളുടെ കടമയായി കാണുന്നു. വരുന്ന തിരഞ്ഞെടുപ്പിലും ഞങ്ങൾ പ്രധാനമന്ത്രി നരേന്ദ്രമോദിയെ പിന്തുണയ്‌ക്കുമെന്നും അദ്ദേഹം പറഞ്ഞു.

മുൻമുഖ്യമന്ത്രി ജയലളിതയുടെ വിശ്വസ്തയായ ശശികലയ്‌ക്കൊപ്പം പ്രവർത്തിക്കാനുള്ള സന്നദ്ധത നേരത്തെ തന്നെ വ്യക്തമാക്കിയതാണ്. അവരുടെ പ്രതികരണത്തിനായി കാത്തിരിക്കുകയാണ്. ഇടപ്പാടി പളനിസാമിയുമായി തെറ്റിയതിനെ തുടർന്ന് 2022ലാണ് ഒ പനീർസെൽവം എഐഎഡിഎംകെയിൽ നിന്നും പുറത്തുപോകുന്നത്.