ഒബിസി ബിൽ പ്രതിപക്ഷ പിന്തുണയോടെ ഇന്ന് ലോക്‌സഭ പാസാക്കിയേക്കും

സംസ്ഥാനങ്ങൾക്ക് ഒബിസി പട്ടിക തയ്യാറാക്കാനുള്ള അധികാരം തിരിച്ച് നൽകുന്നതിനുള്ള ഭരണഘടനാ ഭേദഗതി ബിൽ ഇന്ന് ലോക്‌സഭ പാസാക്കിയേക്കും. ഭരണഘടനയിലെ 127ാം വകുപ്പിന്റെ ഭേദഗതി ബിൽ കേന്ദ്ര സാമൂഹിക നീതി ശാക്തീകരണ മന്ത്രി ഡോ. വീരേന്ദ്ര കുമാർ കാട്ടിക് ഇന്നലെ ലോക്‌സഭയിൽ അവതരിപ്പിച്ചിരുന്നു. ഭരണഘടന ഭേദഗതി ആയതിനാൽ രണ്ട് സഭകളിലും ബിൽ പാസാക്കേണ്ടി വരും.

സംസ്ഥാനങ്ങൾക്ക് അധികാരം തിരിച്ചു നൽകുന്ന ബില്ലിനെ പ്രതിപക്ഷവും പിന്തുണയ്‌ക്കും. ബില്ലിനോട് പൂർണമായും സഹകരിക്കണമെന്ന് രാജ്യസഭയിലെ പ്രതിപക്ഷ നേതാവ് മല്ലികാർജ്ജുൻ ഖാർഗെയുടെ അധ്യക്ഷതയിൽ ചേർന്ന പ്രതിപക്ഷ കക്ഷികളുടെ യോഗം തീരുമാനിച്ചിരുന്നു. ബിൽ പാസായാൽ സംസ്ഥാനങ്ങൾക്കും കേന്ദ്ര ഭരണപ്രദേശങ്ങൾക്കും സ്വന്തമായി ഒബിസി പട്ടിക തയ്യാറാക്കാൻ സാധിക്കും. മെയ് മാസത്തിൽ സുപ്രീംകോടതി വിധിയോടെ സംസ്ഥാനങ്ങൾക്ക് നഷ്ടമായ അധികാരം പുനസ്ഥാപിക്കുക എന്നതാണ് ഇതിലൂടെ ലക്ഷ്യമിടുന്നത്.

മറാഠാ സംവരണത്തിനെതിരെയുള്ള ഹർജികളിലാണ് പിന്നാക്ക വിഭാഗങ്ങളെ തീരുമാനിക്കാൻ രാഷ്‌ട്രപതിക്ക് അധികാരം നൽകുന്ന 102-ാം ഭരണഘടനാ ഭേദഗതി സുപ്രീം കോടതി ശരിവച്ചത്. ഭേദഗതിയനുസരിച്ച് പട്ടിക തയാറാക്കാനുള്ള അധികാരം സംസ്ഥാന സർക്കാരിനില്ലെന്നും കോടതി വ്യക്തമാക്കി. ഇതിനെതിരെ ജൂണിൽ കേന്ദ്രം നൽകിയ പുനഃപരിശോധനാ ഹർജി തള്ളി. ഇതേ തുടർന്നാണ് വീണ്ടും ഭരണഘടനാ ഭേദഗതി കൊണ്ടുവരുന്നത്. ഭരണഘടനയുടെ 342എ വകുപ്പിലാണ് സംസ്ഥാനങ്ങൾക്കുള്ള അധികാരം വ്യക്തമാക്കുന്ന ഭേദഗതി ഉൾപ്പെടുത്തുക.