ഓൺലൈൻ പാർടൈം ജോലിക്കായി ഈ ലിങ്കിൽ ക്ലിക്ക് ചെയ്യു, ഇത്തരം സന്ദേശം ലഭിച്ചാൽ വെറുതെ ക്ലിക്ക് ചെയ്യരുത്, യുവാക്കൾക്ക് നഷ്ടമായത് ലക്ഷങ്ങൾ

കാസർകോട് : ഓൺലൈൻ പാർടൈം ജോലി എന്ന് കേൾക്കുമ്പോൾ ഒന്നും ചിന്തിക്കാതെ എടുത്ത് ചാടുന്നവർക്ക് ഒരു മുന്നറിയിപ്പ്. ഇത്തരം തട്ടിപ്പിനിരയായി കാസർകോട് കളനാട് ചെമ്പിരിക്ക കുഞ്ഞിവീട്ടിൽ പി.ശിവദർശനയും ദേലമ്പാടി മയ്യളയിലെ റഷീദ് മൻസിലിൽ മുഹമ്മദ് റഷീദിനും ലക്ഷങ്ങൾ നഷ്ടമായി. ഗൂഗിൾ മാപ് റിവ്യു ചെയ്യുന്ന ജോലി വാഗ്ദാനം ചെയ്ത് വിവിധ ടാസ്കുകൾ നൽകി ശിവദർശനയിൽ നിന്ന് അഞ്ചുലക്ഷവും കപ്പലിൽ ജോലി വാഗ്ദാനം ചെയ്ത് റഷീദിൽ നിന്ന് വിവിധ നടപടികളുടെ പേരിൽ ഒരു ലക്ഷം രൂപയുമാണ് തട്ടിയത്.

തങ്ങൾ തട്ടിക്കപ്പെട്ടു എന്ന് മനസിലാക്കിയതിന് പിന്നാലെ ഇരുവരും പോലീസിൽ പരാതി നൽകി. പാർടൈം ജോലിക്കുള്ള പ്രീപെയ്ഡ് ടാസ്‌കിന്റെ പേരിൽ വിവിധ അക്കൗണ്ടുകളിലേക്കും യു.പി.ഐ. ഐഡികളിലേക്കും 5,31,070 രൂപ അയപ്പിക്കുകയായിരുന്നു. തിരികെ 1400 രൂപ അയച്ചു. 5,29,670 രൂപയും പ്രതിഫലവും നൽകാതെ പണം തട്ടുകയായിരുന്നു.

ആഗസ്റ്റ് പതിനാറിനും പതിനെട്ടിനും ഇടയിലുള്ള ദിവസങ്ങളിലാണ് പണം തട്ടിയത്. റഷീദ് ഫേസ് ബുക്കിൽ കഴിഞ്ഞ മാർച്ച് 9 മുതൽ 19 വരെയുള്ള കാലയളവിൽ ഷിപ്പിംഗ് കമ്പനിയിൽ ഓർഡിനറി സീമാൻ ജോലി വാഗ്ദാനം ചെയ്തുകൊണ്ടുള്ള പരസ്യം കണ്ടതിനെ തുടർന്നാണ് അപേക്ഷിച്ചത്. വാട്സ്ആപ്പിലേക്ക് അപ്പോയ്‌മെന്റ് ഓർഡർ ലഭിച്ചതിന് പിന്നാലെ തുടർ നടപടി ക്രമങ്ങൾക്കായി രണ്ട് നമ്പറുകളിലേക്കായി ഗൂഗിൾപേ വഴി 50,000 രൂപയും ഫോൺപേ വഴി 50,000 രൂപയും അയച്ചു. എന്നാൽ ഇതിന് ശേഷം യാതൊരു വിവരവും ഇല്ലാതെയായി പിന്നാലെ, യുവാവ് ആദൂർ പൊലീസിൽ പരാതി നൽകുകയായിരുന്നു.