പള്ളിപ്പാടുള്ള വരൻ ലക്നൗവിലുള്ള വധുവിന്റെ കഴുത്തിൽ ഓൺലൈനായി താലി ചാർത്തി

ലോക്ക് ഡൗൺ പ്രഖ്യാപിച്ചതോടെ ആകെ വെട്ടിലായത് കല്യാണ പാർട്ടിക്കാരാണ്. നേരത്തെ മുൻകൂട്ടി നിശ്ചയിച്ച വിവാഹങ്ങൾ പലതും മാറ്റിവെച്ചു. എന്നാൽ ചിലർ ചെറിയ തോതിൽ വിവാഹം നടത്തി. എന്നാൽ ഓൺലൈനിൽ കല്യാണം നടത്തി വിത്യസ്തനായിരിക്കുകയാണ് പള്ളിപ്പാട്ടെ ശ്രീജിത്ത്. ഉച്ചയ്ക്ക് 12.15നും 12.45നുമുള്ള ശുഭമുഹൂർത്തത്തിൽ ഉത്തർപ്രദേശിലെ ലക്നൗവിലുള്ള അഞ്ജനയ്ക്ക് പള്ളിപ്പാട്ടെ അവരുടെ വീട്ടിൽ വച്ച് ശ്രീജിത് താലി ചാർത്തി. കത്തിച്ചുവെച്ച നിലവിളക്കിനു മുന്നിൽ ശ്രീജിത്ത് ഉത്തർ പ്രദേശിലെ വീട്ടിൽ വിവാഹ വേഷത്തിൽ അഞ്ജന. വീഡിയോ കോളിൽ അഞ്ജന എത്തിയതോടെ ഓൺലൈൻ വഴി താലികെട്ട് നടന്നു. ആ സമയം അഞ്ജന സ്വയം കഴുത്തിൽ താലി ചാർത്തി.

സീമന്തരേഖയിൽ ശ്രീജിത്ത് സിന്ദൂരം ചാർത്തിയതോടെ ചടങ്ങുകൾ അവസാനിച്ചു. തുടർന്നു സമുദായ ഭാരവാഹികൾ നൽകിയ റജിസ്റ്ററിൽ വരൻ ഒപ്പു വച്ചു. പള്ളിപ്പാട് കൊടുന്താറ്റ് വീട്ടിൽ ജി.പങ്കജാക്ഷൻ ആചാരിയുടെയും ശ്രീകാന്തയുടെയും മകൾ പി.അഞ്ജനയുടെ വിവാഹമാണ് ഓൺലൈനായി നടന്നത്. ചങ്ങനാശേരി പുഴവാത് കാർത്തികയിൽ നടേശന്റെയും കനകമ്മയുടെയും മകനാണ് വരൻ എൻ.ശ്രീജിത്. ഉത്തർപ്രദേശിൽ ജോലി ചെയ്യുന്ന അ‍ഞ്ജനയ്ക്ക് ലോക്ക് ഡൗൺ കാരണം നാട്ടിലെത്താനായില്ല.

നിയന്ത്രണങ്ങൾ ഉള്ളതിനാൽ ശ്രീജിത്തിന്റെ മാതാപിതാക്കളും സഹോദരൻ സേതുനാഥും കുടുംബവും ഉൾപ്പെടെ 7 പേർ മാത്രമാണ് വിവാഹത്തിനായി പള്ളിപ്പാട്ടെ അ‍ഞ്ജനയുടെ കുടുംബവീട്ടിൽ എത്തിയത്. സദ്യയ്ക്കു ശേഷം ഗൃഹപ്രവേശ ചടങ്ങുകൾക്കായി വരനും കൂട്ടരും ചങ്ങനാശേരിക്ക് പുറപ്പെട്ടു. നവംബർ 6ന് ആയിരുന്നു ഇവരുടെ വിവാഹനിശ്ചയം നടന്നത്. ലക്നൗവിൽ ഐടി എൻജിനീയറാണ് അഞ്ജന. ബാങ്ക് ഉദ്യോഗസ്ഥനാണ് ശ്രീജിത്ത്