മുഖ്യമന്ത്രി പ്രസംഗിക്കാൻ വന്നതും ഉമ്മൻചാണ്ടിക്ക് നിർത്താതെ മുദ്രാവാക്യം വിളിച്ച് അണികൾ, പ്രതിപക്ഷനേതാവ് ഉൾപ്പടെ ഇടപെട്ട് ശാന്തരാക്കി

തിരുവനന്തപുരത്ത് കെപിസിസി സംഘടിപ്പിച്ച ഉമ്മൻ ചാണ്ടി അനുസ്മരണ പരിപാടിയിൽ മുഖ്യമന്ത്രി പിണറായി വിജയനെ ക്ഷണിച്ചതിൽ കോൺ​ഗ്രസിനുള്ളിൽ തന്നെ വലിയ പ്രതിഷേധമായിരുന്നു ഉയർന്നത്. ഇന്ന് വൈകുന്നേരം നടന്ന ചടങ്ങിൽ മുഖ്യമന്ത്രി പിണറായി വിജയനും പങ്കെടുത്തു. മുഖ്യമന്ത്രി പിണറായി വിജയൻ പ്രസംഗിക്കാനായി എഴുന്നേറ്റപ്പോൾ ഉമ്മൻ ചാണ്ടിക്ക് അനുകൂലമായി മുദ്രാവാക്യം വിളിച്ച് അണികൾ സാഹചര്യം ചെറിയ രീതിയിൽ വഷളാക്കി.

ഉമ്മൻ ചാണ്ടിക്ക് നിർത്താതെ മുദ്രാവാക്യം വിളിച്ച സദസിലുണ്ടായിരുന്ന പാർട്ടി പ്രവർത്തകരെ പ്രതിപക്ഷ നേതാവ് വി.ഡി.സതീശൻ, മുൻ പ്രതിപക്ഷ നേതാവ് രമേശ് ചെന്നിത്തല, യുഡിഎഫ് കൺവീനർ എം.എം. ഹസൻ ഉൾപ്പെടെ ഇടപെട്ടാണ് നിശബ്ദരാക്കി. മുഖ്യമന്ത്രി മൈക്കിനു മുന്നിൽ ചെന്നുനിന്നിട്ടും മുദ്രാവാക്യം വിളി തുടർന്നതോടെ സാഹചര്യം നേരിയ രീതിയിൽ മാറി. എന്നാൽ രംഗം വഷളാകാതെ നേതാക്കൾ കൈകാര്യം ചെയ്തു.

കെപിസിസി പ്രസിഡന്റ് കെ.സുധാകരന്റെ അനുസ്മരണ പ്രഭാഷണം പൂർത്തിയായതിനു പിന്നാലെ, അടുത്തതായി മുഖ്യമന്ത്രി പിണറായി വിജയൻ സംസാരിക്കുന്നുവെന്ന് അനൗൺസ് ചെയ്തതിനു തൊട്ടുപിന്നാലെയാണ് മുദ്രാവാക്യം വിളി ആരംഭിച്ചത്. ‘‘ഉമ്മൻ ചാണ്ടി സിന്ദാബാദ്, കണ്ണേ കരളേ കുഞ്ഞൂഞ്ഞേ, ആരു പറഞ്ഞു മരിച്ചെന്ന്…’ തുടങ്ങിയ മുദ്രാവാക്യങ്ങളുമായി പ്രവർത്തകർ ബഹളം വയ്ക്കുകയായിരുന്നു. നേതാക്കൾ ഇടപെട്ടതിനാലാണ് രംഗം ശാന്തമായത്.