ഓപറേഷൻ ബ്ലൂ പ്രിന്‍റ്, സംസ്ഥാനത്തെ പഞ്ചായത്തുകളിൽ വിജിലൻസ്​ നടത്തിയ പരിശോധനയിൽ വ്യാപക ക്രമക്കേട്

തിരുവനന്തപുരം. ഓപറേഷൻ ബ്ലൂ പ്രിന്‍റ്​ എന്ന പേരിൽ സംസ്ഥാനത്തെ പഞ്ചായത്തുകളിൽ വിജിലൻസ്​ നടത്തിയ പരിശോധനയിൽ വ്യാപക ക്രമക്കേട് കണ്ടെത്തി. 57 ഗ്രാമപഞ്ചായത്തുകളിലെ എൻജിനീയറിംഗ് വിഭാഗത്തിലാണ് പരിശോധന നടന്നത്​.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, പാലക്കാട്, തൃശൂർ, മലപ്പുറം, കോഴിക്കോട് എന്നീ ജില്ലകളിലെ 4 ഗ്രാമപഞ്ചായത്തുകൾ വീതവും, എറണാകുളം ജില്ലയിലെ 6 ഗ്രാമപഞ്ചായത്തിലും, ഇടുക്കി, കോട്ടയം ജില്ലകളിലെ 5 ഗ്രാമപഞ്ചായത്തുകൾവീതവും, വയനാട്, കണ്ണൂർ, കാസർഗോഡ് ജില്ലകളിലെ 3ഗ്രാമപഞ്ചായത്തുകൾ വീതവുമായാണ് മിന്നൽ പരിശോധന നടത്തിയത്.

കെട്ടിട നിർമ്മാണ അനുമതിക്കായുള്ള1689 അപേക്ഷകളും, കെട്ടിട നമ്പറിനുവേണ്ടിയുള്ള 504 അപേക്ഷകളും തീരുമാനം എടുക്കാത്തതായി കണ്ടെത്തി.കേരള കെട്ടിട നിർമ്മാണചട്ടം പാലിക്കാതെ പൂർത്തീകരിച്ച നിരവധി വ്യാപാരസ്ഥാപനങ്ങൾക്ക് കെട്ടിട നമ്പർ നൽകിയതായി കണ്ടെത്തി.

തിരുവനന്തപുരം കാട്ടാക്കടയിൽ നടപ്പ് സാമ്പത്തികവർഷം ഇ- ടെൻഡർ അല്ലാതെ ഓപ്പൺ ടെൻഡർ വിളിച്ച നാല്​ നിർമ്മാണ പ്രവർത്തികളും ഒരേ കരാറുകാരന് നൽകിയതായും കണ്ടെത്തി. സ്കൂളുകളിലെ ഒരു കെട്ടിടത്തിന് പഞ്ചായത്ത് അധികൃതർ ഫിറ്റ്നസ് സർട്ടിഫിക്കറ്റ് നൽകിയിട്ടുണ്ടെങ്കിലും വിജിലൻസ് പൊതുമരാമത്ത് വകുപ്പ് ഉദ്യോഗസ്ഥരെ ഉപയോഗിച്ച് പരിശോധിപ്പിച്ചതിൽ ബലക്ഷയമുള്ളതായി കാണ്ടെത്തി.

തൃശ്ശൂർ വടക്കാഞ്ചേരി ഗ്രാമപഞ്ചായത്ത് ഓവർസിയറുടെ ഗൂഗിൾ-പേ അക്കൗണ്ട് വഴി അവിടത്തെ സ്വകാര്യ എൻജിനീയർ നിരവധി തവണ പണമിടപാട് നടത്തിയതായും, കോട്ടയം കല്ലറ ഗ്രാമപഞ്ചായത്തിൽ ഒരു ഓവർസിയർ കഴിഞ്ഞ 10 മാസത്തിനിടയ്ക്ക് വിവിധ കരാറുകാരുമായി ലക്ഷക്കണക്കിന് രൂപ ഗൂഗിൾ-പേ വഴി പണമിടപാട് നടത്തിയതായും കണ്ടെത്തി.

എറണാകുളം മുളന്തുരുത്തി പഞ്ചായത്തിൽ പരിശോധന നടത്തിയപ്പോൾ ബ്ലോക്ക്പഞ്ചായത്തിലെ അസിസ്റ്റന്‍റ്​​ എക്സിക്യൂട്ടീവ് എൻജിനീയറുടെ ഓഫിസിലെ ചില ഫയലുകൾ, എം. ബുക്ക് എന്നിവ അവിടെ കാണപ്പെട്ട ഒരു കരാറുകാരന്‍റെ ബന്ധുവിന്‍റെ കയ്യിൽ നിന്നും വിജിലൻസ് പിടികൂടി.