തിമിരത്തിനുള്ള ശസ്ത്രക്രിയയ്ക്ക് ശേഷം പതിനെട്ടോളം രോഗികള്‍ക്ക് കാഴ്ച നഷ്ടപ്പെട്ടു, ആശുപത്രിക്കെതിരെ പരാതി

രാജസ്ഥാൻ: തിമിരത്തിനുള്ള ശസ്ത്രക്രിയയ്ക്ക് ശേഷം പതിനെട്ടോളം രോഗികള്‍ക്ക് കാഴ്ച നഷ്ടപ്പെട്ടു. ആശുപത്രിക്കെതിരെ പരാതിയുമായി രോ​ഗികൾ. രാജസ്ഥാനിലെ തന്നെ ഏറ്റവും അറിയപ്പെടുന്ന സവായ് മാൻ സിംഗ് (എസ്എംഎസ്) ആശുപത്രിക്കെതിരെയാണ് രോഗികളും ബന്ധുക്കളും രംഗത്തെത്തിയിരിക്കുന്നത്. രാജസ്ഥാൻ സര്‍ക്കാരിന്‍റെ കീഴിലുള്ള ചിരഞ്ജീവി ഹെല്‍ത്ത് സ്കീമിന്‍റെ ഭാഗമായി ഇവിടെ വച്ച് നടത്തിയ തിമിര ശസ്ത്രക്രിയയ്ക്ക് പിന്നാലെയാണ് കാഴ്ച നഷ്ടപ്പെട്ടുവെന്ന പരാതിയുമായി രോഗികള്‍ എത്തിയത്.

‘ജൂണ്‍ 23ന് ഓപ്പറേഷൻ ചെയ്ത രോ​ഗിക്ക് ജൂലൈ5 വരെ കാഴ്ചയ്ക്ക് യാതൊരു കുഴപ്പവും ഉണ്ടായിരുന്നില്ല. എന്നാല്‍ അതിന് ശേഷം രണ്ട് ദിവസം കൊണ്ടാണ് ഒരു കണ്ണിന്‍റെ കാഴ്ച നഷ്ടപ്പെട്ടത്. പൂര്‍ണമായും ഒന്നും കാണാൻ വയ്യാത്ത അവസ്ഥയായി. ഇതോടെ വീണ്ടും ആശുപത്രിയിലെത്തി വീണ്ടും ഓപ്പറേഷനും നടത്തി എന്നിട്ടും ഫലമുണ്ടായില്ലായെന്ന് പരാതിക്കാരില്‍ ഒരാൾ പറയുന്നു.

ഒന്നിന് പിറകെ ഒന്നായി രോഗികള്‍ ഒരു കണ്ണിന്‍റെ കാഴ്ച നഷ്ടപ്പെട്ടതായാണ് പരാതിപ്പെടുന്നത്. പലര്‍ക്കും വീണ്ടും ശസ്ത്രക്രിയ നടത്തിയതായാണ് സൂചന. പലരും അസഹനീയമായ കണ്ണ് വേദനയെ തുടര്‍ന്നും ആശുപത്രിയിലെത്തി. ഇവരില്‍ ചിലര്‍ക്ക് മൂന്നാമത്തെ തവണ വരെ ശസ്ത്രക്രിയ നടത്തിയെന്നും പരാതിയുണ്ട്. എങ്കിലും ആര്‍ക്കും പോസിറ്റീവായ ഫലം കിട്ടിയില്ല. അതേസമയം തങ്ങളുടെ ഭാഗത്ത് നിന്ന് ചികിത്സാപ്പിഴവ് ഉണ്ടായിട്ടില്ല എന്ന് തന്നെയാണ് ഇപ്പോഴും ആശുപത്രി അധികൃതര്‍ ഉറപ്പിച്ച് പറയുന്നത്. പക്ഷേ സംഭവം വിവാദമായതോടെ അന്വേഷണം ആരംഭിച്ചു.