ബിജെപിക്കെതിരേ പി.സിയുടെ ഒളിയമ്പ്, സീറ്റ് നിഷേധിച്ചത് പിണറായി വിജയന്റെ ഇടപെടൽ എന്ന്

ലോക്സഭാ തിരഞ്ഞെടുപ്പിൽ തനിക്ക് വാഗ്ദാനം ചെയ്ത് സീറ്റ് നിഷേധിക്കാൻ ചരടുവലി നടത്തിയത് പിണറായി വിജയൻ എന്ന് ബിജെപിക്ക് എതിരേ ഒളിയമ്പ് എയ്ത് പി സി ജോർജ്. പത്തനംതിട്ട മണ്ഡലത്തിൽനിന്ന് തന്നെ ഒഴിവാക്കുന്നതിനായി പ്രവർത്തിച്ച തുഷാർ വെള്ളാപ്പള്ളിക്കും വെള്ളാപ്പള്ളി നടേശനും പിണറായി വിജയനും ദൈവം കൊടുക്കുമെന്ന് പി.സി. ജോർജ് പറഞ്ഞു. അനിൽ ആന്റണിക്ക് പത്തനം തിട്ട എവിടെ എന്ന് പോലും അറിയില്ല.എന്നാൽ സീറ്റ് കിട്ടാത്ത നിരാശ തനിക്കില്ല. പാർട്ടിയുടെ വിജയത്തിനായി പ്രവർത്തിക്കും.

പത്തനംതിട്ടയിൽ നിന്നാൽ ജയിക്കുമായിരുന്നെന്ന് നൂറു ശതമാനം ഉറപ്പുണ്ട്.ആ ഉറപ്പ് അനിൽ ആന്റണിയുടെ കാര്യത്തിൽ ഇല്ല. 50% കൂടുതൽ വർക്ക് വേണ്ടി വരും. കാരണം സ്ഥനാർഥിയെ പരിചയപ്പെടുത്തുന്നത് മുതൽ പ്രചരണത്തിൽ ഉൾപ്പെടുത്തണം.

ബിജെപിയിൽ എത്തിയാലും ഉള്ളത് തുറന്നടിച്ച് പറയുന്ന പാർട്ടിയിലെ മറ്റൊരു സുബ്രഹ്മണ്യ സ്വാമി ആയി ഇപ്പോൾ പി സി ജോർജ്ജ് മാറുകയാണ്‌. ആരും അദ്ദേഹത്തിന്റെ നാവടക്കാനും നോക്കണ്ട എന്ന രീതിയിൽ.

തുഷാർ വെള്ളാപ്പള്ളി ജയിക്കുന്നത് കാണാം

തുഷാർ വെള്ളാപ്പള്ളി കോട്ടയത്ത് മത്സരിക്കും എന്ന് കേൾക്കുന്നു. ജയിപ്പിക്കാൻ പറ്റുമോ എന്ന് നോക്കുമെന്നും പി.സി. ജോർജ് ഭീഷണി മുഴക്കുന്നു.‘ദൈവം സാക്ഷിയായി പറയുകയാണ്. ഞാനൊരിക്കലും ആരോടും സീറ്റ് വേണമെന്ന് ആവശ്യപ്പെട്ടിട്ടില്ല. ബിജെപിയിൽ ചേർന്നത് ജനുവരി 31നാണ്. പാർട്ടിയിൽ ചേർന്ന ഉടനെ സീറ്റ് വേണമെന്ന് പറയുന്നത് മര്യാദയല്ല. പത്തനംതിട്ടയിൽ ബിജെപി നേതൃത്വം ഒരു അന്വേഷണം നടത്തിയപ്പോൾ 95 ശതമാനം ആളുകളും സ്ഥാനാർഥിയായി പി.സി. ജോർജിന്റെ പേരാണ് പറഞ്ഞത്. അല്ലാതെ ഞാന്‍ സീറ്റ് ആവശ്യപ്പെട്ടിട്ടില്ല.

കോൺഗ്രസ് നേതാവ് ആന്റണിയുടെ മകൻ എന്ന നിലയിലാണ്‌ അനിൽ ആന്റണിക്ക് സീറ്റി കിട്ടാൻ കാരണം.ആന്റണിയുടെ മകൻ എന്ന് പറഞ്ഞു മനസ്സിലാക്കണം. ആ ചെറുപ്പക്കാരൻ കോൺഗ്രസിന്റ മീഡിയ പ്രവർത്തനവുമായി ഡൽഹിയിലായിരുന്നു. പിന്നീടാണ് ബിജെപിയിൽ ചേർന്നത്. കേരളത്തിൽ ബിജെപി പ്രവര്‍ത്തകരുടെ ഇടയിൽ പോലും പ്രശസ്തനായ ഒരാളല്ല.’’ – പി.സി. ജോർജ് ചൂണ്ടിക്കാട്ടി.

വെള്ളാപ്പള്ളി നടേശനും പിണറായി വിജയനും നടത്തിയ ഗൂഢാലോചനയിൽ തുഷാർ വെള്ളാപ്പള്ളി പങ്കെടുക്കാൻ പാടില്ലായിരുന്നുവെന്ന് പി.സി. ജോർജ് പറഞ്ഞു.