സ്വന്തം മണ്ഡലത്തില്‍ പോലും പ്രവര്‍ത്തിക്കാന്‍ കഴിയാത്ത അവസ്ഥ, ഏതൊരു പാർട്ടിക്കും ആവശ്യം മികച്ച നേതാവാണ്, കോൺ‌​ഗ്രസിന് ഇല്ലാത്തതും അതുതന്നെ

തിരുവനന്തപുരം: കെ.മുരളീധരന്റെ വര്‍ക് അറ്റ് ഹോം പരാമര്‍ശത്തിനേതിരേ രൂക്ഷ വിമര്‍ശനവുമായി പത്മജ വേണുഗോപാല്‍. അനിയനായിരുന്നെങ്കില്‍ അടി കൊടുക്കാമായിരുന്നുവെന്നും ചേട്ടനായിപ്പോയെന്നും പത്മജ വേണുഗോപാല്‍ പറഞ്ഞു.

കോൺ‌​ഗ്രസ് തന്നെ പൂർണമായും അവ​ഗണിച്ചുവെന്ന് പദ്മജ തുറന്നടിച്ചു. അപമാനം സഹിച്ചാണ് അവിടെ തുടർന്നതെന്നും അവർ പറഞ്ഞു. ഏത് പാർ‌ട്ടിക്കും ശക്തനായൊരു നേതാവ് വേണം. കോൺ​ഗ്രസ് പാർ‌ട്ടിക്ക് ഇല്ലാത്തതും അതുതന്നെയാണ്. നേതാക്കൾക്ക് സമയമില്ലെന്നാണ് പറയുന്നത്. സോണിയ ആരെയും കാണുന്നില്ല. ​രാഹുലിനും സമയമില്ല. പിന്നെ നേതാക്കൾ ഇല്ല.

തൃശൂരിൽ നിന്ന് ഓടിക്കുകയാണ് നാലഞ്ച് പേുടെ ലക്ഷ്യം. എവിടെയും തനിക്കെതിരെ പ്രശ്നങ്ങൾ മാത്രമാണ്. നേതൃത്വത്തോട് പറയുമ്പോൾ നിസാരവത്കരിക്കുകയാണ്. ഇതെല്ലാം കാലങ്ങളായി എന്റെ മനസിനെ വേദനിപ്പിക്കുന്നു. ഇത്രയേറെ ആളുകൾ പാർ‌ട്ടി വിട്ടുപോയിട്ടും ഇതുവരെ കോൺ​ഗ്രസുകാർക്ക് കൊണ്ടിട്ടില്ലാന്നാണ് തോന്നുന്നത്. എന്റെ പിതാവ് പോയപ്പോൾ പോലും അദ്ദേഹ​ത്തെ ഇത്തരത്തിൽ ചീത്ത പറഞ്ഞിട്ടുണ്ട്. അന്ന് ഞാനും കോൺ​ഗ്രസിൽ‌ ഉറച്ച് നിന്നയാളാണ്.

ഞാൻ ജനിച്ചത് മുതൽ ഇന്നലെ വരെ കോൺ​ഗ്രസുകാരിയായി ജീവിച്ചയാളാണ്. പക്ഷേ കഴിഞ്ഞ മൂന്ന് വർഷമായി പാർ‌ട്ടിയുമായി അകൽച്ചയിലാണ്. രണ്ട് തവണയും തിരഞ്ഞെടുപ്പിൽ‌ എന്നെ തോൽപ്പിച്ചത് ആരാണെന്ന് വ്യക്തമായി അറിയാം. വലിയ നേതാക്കൾക്കെതിരെ പരാതി കൊടുക്കാൻ അവകാശമില്ലാത്തതിനാൽ താഴെ തട്ടിലുള്ളവർക്ക് പല തവണ പരാതി നൽകിയിട്ടുണ്ട്. കെപിസിസി പരാതി അവ​ഗണിച്ചുവെന്ന് മാത്രമല്ല, എന്റെ മണ്ഡലത്തിൽ പോലും പ്രവർത്തിക്കാൻ കഴിയാത്ത സാഹചര്യമാണ് കോൺ​ഗ്രസ് ഉണ്ടാക്കിയതെന്നും പത്മജ പറഞ്ഞു.