ദുരിതാശ്വാസ സാമഗ്രികളുമായി തുർക്കിയിലേക്ക് പോയ ഇന്ത്യൻ വിമാനത്തിന് വ്യോമപാത നിഷേധിച്ച് പാകിസ്ഥാൻ

ന്യൂ ഡൽഹി . തുർക്കിയിലെ ഭൂകമ്പബാധിതർക്ക് ദുരിതാശ്വാസ സാമഗ്രികളുമായി പോവുകയായിരുന്ന ഇന്ത്യൻ എൻഡിആർഎഫ് വിമാനത്തിന് പാകിസ്ഥാൻ വ്യോമാതിർത്തി നിഷേധിച്ചു. തുടർന്ന് വിമാനം വഴിതിരിച്ചു വിട്ടു. ദുരന്തനിവാരണ സേനാംഗങ്ങളും മെഡിക്കൽ സംഘവും ഉൾപ്പെടുന്ന വിമാനത്തിൽ ദുരന്തനിവാരണ സാമഗ്രികളും മരുന്നും ഭക്ഷണവുമെല്ലാം ഉണ്ടായിരുന്നു. മണ്ണിനടിയിൽപ്പെട്ടവരെ തെരഞ്ഞു കണ്ടുപിടിക്കാൻ പ്രത്യേക പരിശീലന ലഭിച്ച നായകളെയും ഇന്ത്യ തുർക്കിയിലേക്ക് അയച്ചിരുന്നു.

നേരത്തെ, തന്റെ രാജ്യത്തിന് ദുരിതാശ്വാസ സാമഗ്രികളും സാമ്പത്തികസഹായവും നൽകുന്ന ഇന്ത്യൻ സർക്കാരിന്റെ ഔദാര്യത്തിന് “ദോസ്ത്” എന്നാണ് തുർക്കി അംബാസഡർ ഫിരത് സുനൽ വിശേഷിപ്പിച്ചിരുന്നത്. തുർക്കിയിലേക്ക് സഹായം അയച്ചതിന് ഫിരത് സുനൽ ഇന്ത്യയോട് നന്ദി പറഞ്ഞിരുന്നു. ‘ആവശ്യമുള്ള സമയത്തെ സുഹൃത്ത് തീർച്ചയായും ഒരു നല്ല സുഹൃത്താണ്.’ തുർക്കിക്ക് നൽകുന്ന അടിയന്തിര സഹായത്തിനു ഇന്ത്യയോട് നന്ദി പറഞ്ഞ് തുർക്കി അംബാസഡർ സോഷ്യൽ മീഡിയയിൽ കുറിച്ചു.

മൂന്ന് വൻ ഭൂകമ്പങ്ങളെത്തുടർന്ന് തുർക്കിയിൽ വൻ നാശനഷ്ടമാണ് ഉണ്ടായത്. തിങ്കളാഴ്ച കേന്ദ്ര വിദേശകാര്യ സഹമന്ത്രി (എംഒഎസ്) വി മുരളീധരൻ തുർക്കി എംബസി സന്ദർശിച്ച് അനുശോചനം രേഖപ്പെടുത്തിയിരുന്നു. പ്രധാനമന്ത്രി നരേന്ദ്ര മോദിയുടെ മാനുഷിക പിന്തുണയും അദ്ദേഹം തുർക്കി എംബസി അറിയിക്കുകയു ണ്ടായി. രക്ഷാപ്രവർത്തകരെയും മെഡിക്കൽ സംഘത്തെയും ഇന്ത്യ തുർക്കിയിലേക്ക് അയച്ചിട്ടുണ്ട്.

തുർക്കി സർക്കാരുമായി ഏകോപിപ്പിച്ച് ദുരിതാശ്വാസ സാമഗ്രികൾ സഹിതം എൻഡിആർഎഫിന്റെയും മെഡിക്കൽ രക്ഷാപ്രവർത്തന സംഘങ്ങളെ ഉടൻ അയക്കാൻ തീരുമാനിച്ചതായി പ്രധാനമന്ത്രിയുടെ ഓഫീസ് (പിഎംഒ) നേരത്തെ അറിയിച്ചിരുന്നു. പ്രത്യേക പരിശീലനം ലഭിച്ച ഡോഗ് സ്ക്വാഡുകളും ആവശ്യമായ ഉപകരണങ്ങളുമായി 100 പേർ അടങ്ങുന്ന ദേശീയ ദുരന്ത നിവാരണ സേനയുടെ (എൻ‌ഡി‌ആർ‌എഫ്) രണ്ട് ടീമുകൾ ഭൂകമ്പ ബാധിത പ്രദേശത്തേക്ക് തിരച്ചിലിനും രക്ഷാപ്രവർത്തനത്തിനും പോകുകയാണെന്നും പ്രധാനമന്ത്രിയുടെ ഓഫീസ് അറിയിക്കുകയുണ്ടായി.