പാലക്കാട് ക്ഷേത്രത്തിൽ വൻ കവർച്ച: രണ്ട് ഭണ്ഡാരത്തിലെയും കാണിക്ക കവർന്നു

പാലക്കാട്: പാലക്കാട് മുണ്ടൂരിൽ ക്ഷേത്രഭണ്ഡാരം കുത്തിത്തുറന്ന് വൻ കവർച്ച. മൈലംപുള്ളി വടക്കുംപുറം ശിവക്ഷേത്രത്തിലാണ് കവർച്ച നടന്നത്. രാത്രിയിലാണ് കവർച്ചയുണ്ടായത്.

രണ്ട് ഭണ്ഡാരവും കമ്പിപ്പാര ഉപയോഗിച്ച് തകർത്ത നിലയിലാണ്. പണവുമായി ക്ഷേത്രത്തിന്റെ പിന്നിലൂടെ സംഘം രക്ഷപ്പെട്ടുവെന്നാണ് കരുതുന്നത്. ഓഫിസ് മുറിയിലുള്ള അലമാരയും കുത്തിത്തുറന്നിട്ടുണ്ട്. രാവിലെ ക്ഷേത്രത്തിലെത്തിയ ജീവനക്കാരിയാണ് കവർച്ചാ വിവരം അറിഞ്ഞത്. സംഭവത്തിൽ കോങ്ങാട് പോലീസ് അന്വേഷണം തുടങ്ങി.

കർക്കടക മാസ പൂജ സമയത്തെ മുഴുവൻ കാണിക്കയും രണ്ട് ഭണ്ഡാരത്തിലായിരുന്നു. ചിങ്ങമാസ പൂജകൾക്കായി നട തുറക്കുന്നതിനൊപ്പം ഭണ്ഡാരവും തുറന്ന് പണം തിട്ടപ്പെടുത്തുന്നതിനായിരുന്നു തീരുമാനം. കോങ്ങാട് പോലീസ് സ്ഥലത്തെത്തി തെളിവ് ശേഖരിച്ചു. സമീപത്തെ സിസിടിവി ദൃശ്യങ്ങൾ ഉൾപ്പെടെ പിന്തുടർന്നുള്ള അന്വേഷണമാണ് പോലീസ് തുടങ്ങിയിട്ടുള്ളത്.