പാലാരിവട്ടം പാലത്തിന്റെ അറ്റകുറ്റ പണികൾ പൂർത്തിയായി, ഇന്ന് സർക്കാരിന് കൈമാറും

പാലാരിവട്ടം മേൽപ്പാലം ഇന്ന് വൈകുന്നേരം സർക്കാരിന് കൈമാറും. ഭാരപരിശോധന റിപ്പോർട്ട് ആർ.ബി.ഡി.സി.കെക്കും സംസ്ഥാന പൊതുമരാമത്തുവകുപ്പിനും കൈമാറും. റിപ്പോർട്ട് വിലയിരുത്തി പൊതുമരാമത്തുവകുപ്പും ആർ.ബി.ഡി.സി.കെയും നൽകുന്ന സർട്ടിഫിക്കറ്റിന്റെ അടിസ്ഥാനത്തിൽ ഈ മാസം 10ന് മുമ്പ് പാലം പൊതുജനങ്ങൾക്കായി തുറന്നുകൊടുത്തേക്കും. അവസാനഘട്ട പരിശോധനകൾ മെട്രോമാൻ ഇ. ശ്രീധരന്റെ നേതൃത്വത്തിൽ വിജയകരമായി പൂർത്തിയായിരുന്നു.

2016 ഒക്ടോബറിൽ ഉദ്ഘാടനം ചെയ്ത പാലത്തിന്റെ ഉപരിതലത്തിൽ 2017ൽ കുഴികൾ കണ്ടെത്തി. തുടർന്ന് നടത്തിയ പരിശോധനയിലാണ് ടാറിങ്ങിലും ഡെക്ക് കണ്ടിന്യുറ്റിയിലും പ്രശ്‌നങ്ങൾ കണ്ടെത്തിയത്. അതേത്തുടർന്ന് കോടികൾ ചെലവഴിച്ച് പണിത പാലാരിവട്ടം പാലം രണ്ടരവർഷത്തെക്കു പുതുക്കിപ്പണിയുന്നതിനായി അടച്ചിടുകയായിരുന്നു.

സെപ്തംബർ 29നാണ്  പാലത്തിന്റെ പുനർനിർമ്മാണ പ്രവർത്തനങ്ങൾ തുടങ്ങിയത്. വൈറ്റില, കുണ്ടന്നൂർ മേൽപ്പാലങ്ങൾക്ക് പുറമെ പാലാരിവട്ടം പാലം കൂടി തുറക്കുന്നതോടെ കൊച്ചിയിലെ ഗതാഗതക്കുരുക്കിന് പരിഹാരമാകുമെന്നാണ് പ്രതീക്ഷ.