പഞ്ചരത്‌നം വീട്ടിലേക്ക് ആദ്യ കു‍ഞ്ഞ് രാജകുമാരനെത്തി, ആശംസകളുമായി സോഷ്യൽ മീഡിയ

മലയാളികൾ ഒന്നടങ്കം ഏറ്റെടുത്ത സഹോദരങ്ങൾ ആയിരുന്നു പഞ്ചരത്‌നം. ജനനം മുതൽ വാർത്തകളിൽ ഇടം പിടിച്ച പഞ്ചരത്‌നങ്ങൾ കഴിഞ്ഞ വർഷമാണ് വിവാഹിതയായത്. ഉത്ര, ഉത്രജ, ഉത്തര, ഉത്തമ, ഉത്രജൻ എന്നീ പേരുകളെക്കാൾ പഞ്ചരത്‌നം എന്ന പേരാണ് മലയാളികൾ ഏറ്റെടുത്തതും. 1995 നവംബർ 18 നാണ് പ്രേം കുമാറിനും രമാദേവിക്കും ഈ അഞ്ച് കൺമണികൾ ജനിക്കുന്നത്. ഭർത്താവ് മരണപ്പെട്ടതിനു ശേഷം അഞ്ച് മക്കളെയും സഹകരണ ബാങ്കിലെ ചെറിയ വരുമാനമുള്ള ജോലി ചെയ്തായിരുന്നു രമദേവി നോക്കിയിരുന്നത്. ഒരുമിച്ചായിരുന്നു ഇവരുടെ ജീവിതത്തിലെ എല്ലാ കാര്യങ്ങളും നടന്നിരുന്നത്. എന്നാൽ വിവാഹം മാത്രം ഒരു ദിവസം മൂന്ന് പേരുടെ മാത്രമേ നടത്തുവാൻ സാധിച്ചിരുന്നുള്ളു.

ഇപ്പോഴിതാ ഈ അഞ്ചു മക്കളിലെ ഒരാൾ അമ്മയായിരിക്കുകയാണ്. പഞ്ചരത്‌നങ്ങളിൽ ഒരാളായ ഉത്തര ഒരു ആൺകുഞ്ഞിന് ജന്മം നൽകിയിരിക്കുകയാണ്. കഴിഞ്ഞ ദിവസമാണ് ഉത്തര തിരുവനന്തപുരത്തെ സ്വകാര്യ ആശുപത്രിയിൽ കുഞ്ഞിന് ജന്മം നൽകിയത്. പഞ്ചരത്‌നങ്ങളിൽ മൂന്നാമത്തെ ആളാണ് ഉത്തര. തങ്ങൾക്കിടയിലേക്ക് ആദ്യമെത്തിയ കണ്മണിയെ ഏറെ ആഘോഷത്തോടെ വരവേൽക്കുകയാണ് കുടുംബം.

ഇന്നിപ്പോൾ രമാദേവി ഒരു മുത്തശ്ശിയായ സന്തോഷം ആഘോഷമാക്കുകയാണ് കുടുംബം. കോഴിക്കോട് സ്വദേശിയായ മാധ്യമപ്രവർത്തകൻ കെ ബി മഹേഷ് കുമാർ ആണ് ഉത്തരയുടെ ഭർത്താവ്. ഫാഷൻ ഡിസൈനറായ ഉത്രയുടെ ഭർത്താവ് മസ്‌കറ്റിൽ ഹോട്ടൽ മാനേജരായ അജിത് ആണ്. കുവൈത്തിൽ അനസ്തീഷ്യാ ടെക്നിഷ്യനായ പത്തനംതിട്ട സ്വദേശി ആകാശാണ് അനസ്തീഷ്യാ ടെക്നിഷ്യനായ ഉത്രജയെ ജീവിതസഖിയാക്കുന്നത്. കുവൈത്തിൽ നിന്നും എത്താൻ സാധിക്കാത്തതിനാൽ ഉത്രജയുടെ വിവാഹം അന്ന് നടന്നിരുന്നില്ല.