വനിതാ ഡോക്ടർക്ക് മദ്യലഹരിയിലായിരുന്ന രോഗിയുടെ മർദനം, സംഭവം തലശ്ശേരിയിൽ

കണ്ണൂർ : ചികിത്സക്കിടെ വനിതാ ഡോക്ടറെ കൈയ്യേറ്റം ചെയ്ത് മദ്യലഹരിയിലായിരുന്ന രോഗി. സംഭവത്തിൽ കൊടുവള്ളി സ്വദേശി മഹേഷിനെതിരെ തലശ്ശേരിയിലെ ആശുപത്രിയിലെ ഡോ. അമൃത രാഖി പോലീസിൽ പരാതി നൽകി. മദ്യപിച്ചുണ്ടായ തർക്കത്തെത്തുടർന്നാണ് ഇയാളെ തലശ്ശേരിയിലെ ആശുപത്രിയിലേക്ക് എത്തിച്ചത്. ഇയാൾക്കൊപ്പം ഭാര്യയും സുഹൃത്തും ഉണ്ടായിരുന്നു. ആക്സിഡന്‍റിൽ പരിക്കേറ്റതായാണ് ആശുപത്രിയിൽ പറഞ്ഞത്.

തിങ്കളാഴ്ച പുലർച്ചെ 2.30-നായിരുന്നു സംഭവം. വാരിയെല്ലിന് ക്ഷതം ഏറ്റിട്ടുണ്ടെന്ന സംശയം പ്രകടിപ്പിച്ചതിനെത്തുടർന്ന് വാരിയെല്ല് ഡോക്ടർ പരിശോധിക്കുകയായിരുന്നു. ഈ സമയത്താണ് പ്രതി ഡോക്ടറെ ആക്രമിച്ചത്. മുറിവ് പരിശോധിക്കാനായി രോഗിയെ ഡ്രസിങ് റൂമിലേക്ക് മാറ്റി. തലയ്ക്കേറ്റ മുറിവ് പരിശോധിക്കുമ്പോൾ, നെഞ്ചിലാണ് വേദന എന്ന് ഇയാൾ പറഞ്ഞു. തുടർന്ന് നെഞ്ച് പരിശോധിക്കുമ്പോൾ മഹേഷ് വലതുകൈ വീശി ഡോക്ടറുടെ നെഞ്ചിൽ അടിച്ചു.

പരിശോധനയുടെ ഭാഗമായിട്ടാണ് നെഞ്ചിൽ അമർത്തിയത് എന്ന് പറഞ്ഞപ്പോൾ, വേദനയുള്ള ഭാഗത്ത് അമർത്തിയിട്ടാണോ പരിശോധിക്കുന്നത് എന്ന് പറഞ്ഞ് ആക്രോശിക്കുകയായിരുന്നു. വാക്കുകൾ ശ്രദ്ധിക്കണം ഇല്ലെങ്കിൽ പോലീസിനെ വിളിക്കും എന്ന് അയാളോട് തിരിച്ചു പറഞ്ഞപ്പോൾ വിളിക്കേണ്ടവരൊക്കെ വിളിക്ക് പുറത്തുവെച്ച് കണ്ടോളാം എന്നായിരുന്നു പ്രതിയുടെ മറുപടി.