പിണറായിയുടെ പൊളിറ്റിക്കൽ സെക്രട്ടറി പുത്തലത്ത് ദിനേശന് പ്രതിമാസം 12,090 രൂപ പെൻഷനും 2.88 ലക്ഷം ഗ്രാറ്റുവിറ്റിയും

തിരുവനന്തപുരം . മുഖ്യമന്ത്രി പിണറായി വിജയന്റെ മുൻ പൊളിറ്റിക്കൽ സെക്രട്ടറി പുത്തലത്ത് ദിനേശന് പ്രതിമാസം 12,090 രൂപ പെൻഷൻ അനുവദിച്ച് ഉത്തരവിറക്കി സർക്കാർ. ഒന്നാം പിണറായി സർക്കാരിന്റെ കാലത്തേതുൾപ്പടെ ആറു വർഷം സേവന കാലാവധിയായി പരിഗണിച്ചു കൊണ്ടാണ് ഉത്തരവ്.

2.88 ലക്ഷം ഗ്രാറ്റുവിറ്റിയായും 6.44 ലക്ഷം രൂപ പെൻഷൻ കമ്യൂട്ടേഷനായും പുത്തലത്ത് ദിനേശന് അനുവദിച്ചു. ഇത് സംബന്ധിച്ച് ഇക്കഴിഞ്ഞ ബുധനാഴ്ചയാണ് ഉത്തരവിറക്കിയത്. 2016 ജൂൺ മുതൽ 2022 ഏപ്രിൽ വരെയായിരുന്നു പുത്തലത്ത് ദിനേശൻ മുഖ്യമന്ത്രിയുടെ പൊളിറ്റിക്കൽ സെക്രട്ടറിയായി ജോലി നോക്കിയിരുന്നത്. 1,30,000 രൂപയായിരുന്നു പുത്തലത്തിന്റെ ശമ്പളം.

ആറു വർഷം ജോലി ചെയ്ത വകയിൽ ടെർമിനൽ സറണ്ടറായി 7,80,000 രൂപ കിട്ടുന്നതിനും പുത്തലത്ത് ദിനേശന് അർഹതയുണ്ടെന്നാണ് പുറത്ത് വരുന്ന റിപ്പോർട്ടുകൾ പറയുന്നത്. നിലവിൽ പുത്തലത്ത് ദിനേശൻ സിപിഎം മുഖപത്രത്തിന്റെ എഡിറ്ററാണ്. അതേസമയം, മുഖ്യമന്ത്രിയുടെ മുൻ പൊളിറ്റിക്കൽ സെക്രട്ടറി എന്ന് രേഖപ്പെടുത്തുന്നതിന് പകരം മുൻ മുഖ്യമന്ത്രിയുടെ പൊളിറ്റിക്കൽ സെക്രട്ടറി എന്നാണ് ഉത്തരവിൽ രേഖപ്പെടുത്തിയിട്ടുള്ളത് എന്നതാണ് വിചിത്രം.