ആശുപത്രി ശുചിമുറിയിൽ 17കാരി പ്രസവിച്ച സംഭവം; പ്രതി പിടിയിൽ

കണ്ണൂർ: 17കാരിയായ ആദിവാസി പെൺകുട്ടി ആശുപത്രി ശുചിമുറിയിൽ പ്രസവിച്ച സംഭവത്തിൽ കുട്ടിയെ പീഡനത്തിനിരയാക്കിയ പ്രതി പിടിയിൽ. മലപ്പട്ടം സ്വദേശി കൃഷ്ണൻ (53) ആണ് പിടിയിലായത്. വയറുവേദനയെ തുടർന്ന് ഇരിട്ടി താലൂക്ക് ആശുപത്രിയിലെത്തിച്ച പെൺകുട്ടി ശുചിമുറിയിൽ പ്രസവിക്കുകയായിരുന്നു. ഞായറാഴ്ച രാവിലെയായിരുന്നു സംഭവം.

പീഡനത്തിനിരയായ പെൺകുട്ടിയുടെ വീട്ടുകാരുമായുള്ള അടുപ്പം പ്രതി മുതലെടുക്കുകയായിരുന്നു. പ്രതിക്കെതിരെ പോക്സോയും ബലാത്സംഗക്കുറ്റവും ചുമത്തി ഉളിക്കൽ പൊലീസാണ് അറസ്റ്റ് ചെയ്തത്. പെൺകുട്ടിയുടെ മൊഴിയുടെ അടിസ്ഥാനത്തിലാണ് അറസ്റ്റ്. ഉളിക്കല്‍ അറബി സ്വദേശിനിയാണ് പെൺകുട്ടി.

വയറുവേദനയെ തുടര്‍ന്നായിരുന്നു ചികിത്സക്കായി എത്തിയത്. ആശുപത്രിയിൽ നടത്തിയ പരിശോധനയിൽ ഗർഭിണിയാണെന്ന് മനസിലായിരുന്നില്ല. പെൺകുട്ടിയെ വിദഗ്ധ ചികിത്സയ്ക്കായി കണ്ണൂർ ജില്ല ആശുപത്രിയിലേക്ക് മാറ്റി. പൂർണ്ണ ആരോഗ്യമുള്ള കുഞ്ഞിനാണ് പെൺകുട്ടി ജന്മംനൽകിയത്.