വിദ്യാർത്ഥികളെ പീഡിപ്പിച്ചു, പോക്‌സോ കേസിൽ മദ്രസാ അധ്യാപകർ ഉൾപ്പെടെ നാലുപേർ അറസ്റ്റിൽ

എരമംഗലം : പോക്‌സോ കേസിൽ പെരുമ്പടപ്പ് പാലപ്പെട്ടിയിൽ മൂന്ന് മദ്രസാ അധ്യാപകർ ഉൾപ്പെടെ നാലുപേർ അറസ്റ്റിൽ. പ്രൈമറി സ്‌കൂളിലെ വിദ്യാർത്ഥികളെയാണ് ഇവർ പീഡനത്തിന് ഇരയാക്കിയത്. പാലപ്പെട്ടി സ്വദേശി തൈപ്പറമ്പിൽ ബാവ (54), മദ്രസാ അധ്യാപകരായ പൊറ്റാടി കുഞ്ഞഹമ്മദ് (64), തണ്ണിപ്പാരന്റെ മുഹമ്മദുണ്ണി (67), പാലക്കാട് കൊച്ചിയിൽ മണത്തിൽ ഹൈദ്രോസ് (50) എന്നിവരെയാണ് പെരുമ്പടപ്പ് പോലീസ് പിടികൂടിയത്.

ലൈംഗികാതിക്രമം നേരിട്ടകാര്യം സ്‌കൂളിലെ കൗൺസലിങ്ങിലാണ് വിദ്യാർഥികൾ തുറന്നു പറഞ്ഞത്. തുടർന്ന് കേസെടുത്ത പെരുമ്പടപ്പ് പോലീസ് എസ്.എച്ച്.ഒ. ഇ.പി. സുരേഷിന്റെ നേതൃത്വത്തിൽ പ്രതികളെ പിടികൂടി. പെരിന്തൽമണ്ണ ജുഡീഷ്യൽ ഫസ്റ്റ് മജിസ്‌ട്രേറ്റിനുമുൻപിൽ ഹാജരാക്കിയ പ്രതികളെ റിമാൻഡ് ചെയ്തു. പോക്‌സോ ഉൾപ്പടെയുള്ള വകുപ്പുകളാണ് പ്രതികൾക്കെതിരെ ചുമത്തിയിട്ടുള്ളത്.

അതേസമയം പെരിന്തൽമണ്ണയിൽ പോക്സോ കേസിൽ ഓട്ടോറിക്ഷ ഡ്രൈവർക്ക് 19 വർഷം കഠിന തടവ് ശിക്ഷ വിധിച്ചു. മലപ്പുറം വാണിയമ്പലം സ്വദേശി അബ്ദുൽ വാഹിദിനെയാണ് പെരിന്തൽമണ്ണ ഫാസ്റ്റ്ട്രാക്ക് സ്‌പെഷ്യൽ കോടതി 19 വർഷം കഠിന തടവിന് ശിക്ഷിച്ചത്. 12 വയസ്സിൽ താഴെ മാത്രം ഉള്ള പെൺകുട്ടിയെ 2018 മുതൽ 2020 വരെയുള്ള കാലയളവിൽ ലൈംഗിക അതിക്രമത്തിന് ഇരയാക്കി എന്നാണ് കേസ്.

വണ്ടൂർ സിഐ ആയിരുന്ന ദിനേശ് കൊറോട്ടാണ് അന്വേഷണം നടത്തി കുറ്റപത്രം സമർപ്പിച്ചത്. പ്രതി വാണിയമ്പലം മട്ടക്കുളം മനുറയിൽ വീട്ടിൽ അബ്ദുൽ വാഹിദിനെതിരെ 19 വർഷം കഠിന തടവിനും 75000 രൂപ പിഴ അടക്കാനും കോടതി ശിക്ഷി വിധിച്ചു.