ഇത്ര അടുത്തു നിന്നും മോചനദ്രവ്യം ആവശ്യപ്പെടാറില്ല, പിന്നില്‍ കൃത്യമായ ആസൂത്രണം ഉണ്ടെന്ന് പോലീസ്

തിരുവനന്തപുരം. കുട്ടിയെ ഓയൂരില്‍ നിന്നും കൃത്യമായ ആസൂത്രണത്തോടെയാണ് നാലംഗ സംഘം തട്ടിക്കൊണ്ട് പോയതെന്ന് പോലീസ്. സ്വന്തം മൊബൈല്‍ ഫോണ്‍ ഉപയോഗിക്കാതെയും വ്യാജ നമ്പര്‍ പ്ലേറ്റ് ഉപയോഗിച്ചതുമാണ് പോലീസിനെ പ്രതിസന്ധിയിലാക്കുന്നത്. മുമ്പ് തന്നെ വെള്ള നിറത്തിലുള്ള കാര്‍ വീടിന്റെ പരിസരത്ത് കറങ്ങുന്നതായി കുട്ടികള്‍ വീട്ടില്‍ പറഞ്ഞിരുന്നു.

അതേസമയം നാട്ടുകാരും ഇക്കാര്യം പോലീസിനോട് പറഞ്ഞു. കുട്ടിയെ തട്ടിക്കൊണ്ട് പോയി മൂന്നര മണിക്കൂറിന് ശേഷമാണ് കുട്ടിയുടെ അമ്മയുടെ ഫോണിലേക്ക് വിളിയെത്തുന്നത്. കുട്ടിയില്‍ നിന്നാണ് നമ്പര്‍ ലഭിച്ചത് അതോ ശേഖരിച്ചതാണോ എന്ന് വ്യക്തമല്ല. ഇത്തരത്തിലുള്ള സംഭവങ്ങള്‍ക്ക് ശേഷം സംഭവ സ്ഥലത്തു നിന്നും ദൂരത്തേക്ക് മാറാനാണ് ക്രിമിനല്‍ സംഘങ്ങള്‍ ശ്രമിക്കാറുള്ളതെന്ന് പോലീസ് പറയുന്നു.

തട്ടിക്കൊണ്ട് പോയ സ്ഥലത്തു നിന്നും അല്‍പം മാറി മോചനദ്രവ്യം ആവശ്യപ്പെടുന്നത് പതിവ് രീതിയല്ലെന്നും പോലീസ്, അതേസമയം കുടുംബവുമായി പരിചയമുള്ളവരുടെ പശ്ചാത്തലവും പോലീസ് പരിശോധിക്കുന്നുണ്ട്.