താനൂർ ബോട്ട് ദുരന്തത്തിൽ പോലീസ് ഉദ്യോ​ഗസ്ഥനായ സബറുദ്ദീൻ മരിച്ചത് ഡ്യൂട്ടിക്കിടെ

മലപ്പുറം. താനൂർ ബോട്ട് ദുരന്തത്തിൽ പോലീസുകാരനായ സബറുദ്ദീൻ മരിച്ചത് ഡ്യൂട്ടിക്കിടെയെന്ന് മലപ്പുറം എസ്പി. അസന്വേഷണവുമായിട്ടാണ് സബുറുദ്ദീൻ ബോട്ടിൽ യാത്ര ചെയ്തത്. മലപ്പുറം എസ്പിയുടെ സ്പെഷ്യൽ സ്‌ക്വാഡ് അംഗവുവും താനൂർ പോലീസ് സ്റ്റേഷനിലെ സിവിൽ പോലീസ് ഓഫീസറുമായിരുന്നു സബുറുദ്ദീൻ.

മോഷണക്കേസ് അടക്കമുള്ള കേസന്വേഷണങ്ങളുടെ ഭാഗമായിരുന്നു അദ്ദേഹം. മയക്കുമരുന്ന് കേസന്വേഷണവുമായി ബന്ധപ്പെട്ടാണ് അദ്ദേഹം തൂവൽത്തീരത്ത് എത്തിയത് എന്നാണ് പോലീസുകാർ നൽകിയ വിവരത്തിൽ നിന്ന് വ്യക്തമാകുന്നത്. സ്ഥലം വിജനമായതു കൊണ്ടു തന്നെ ലഹരി ഉപയോഗവും മറ്റും വ്യാപകമാണ്. അത് പരിശോധിക്കാൻ അദ്ദേഹം ബോട്ടു മാർഗം അക്കരെ കടക്കാനുള്ള യാത്രയിലായിരുന്നിരിക്കാം എന്നാണ് നിഗമനം.

അപകടത്തിൽപ്പെട്ട ബോട്ടിലെ ജീവനക്കാർ ലഹരിയും മറ്റും ഉപയോഗിക്കുന്നുണ്ടോ എന്ന് പരിശോധിക്കാനാകാം അദ്ദേഹം ബോട്ടിൽ കയറിയത് എന്ന സാധ്യതയും പോലീസ് പറയുന്നു. കേരള പോലീസിന്റെ അഭിമാനമായിരുന്ന സബറുദ്ദീൻ മോഷണക്കേസുകളടക്കം ഒട്ടേറെ കേസുകൾക്ക് തുമ്പുണ്ടാക്കുന്നതിൽ നിർണായക പങ്കു വഹിച്ചയാളാണ്.