രാഷ്ട്രീയ പ്രവേശനത്തിന് തയ്യാറെടുത്ത് വിശാലും; വിജയിക്കൊപ്പം 2026 ലെ തിരഞ്ഞെടുപ്പോ ലക്ഷ്യം

ചെന്നൈ: നടൻ വിജയുടെ രാഷ്ട്രീയ പ്രവേശനത്തിന് പിന്നാലെ മറ്റൊരു നടൻ കൂടി രാഷ്ട്രീയത്തിലേക്ക് ഇറങ്ങാൻ പോകുന്നതായി റിപ്പോർട്ട്. നടൻ വിശാൽ ആണ് രാഷ്ട്രീയ പ്രവേശനത്തിനു തയാറെടുക്കുന്നത്. കഴിഞ്ഞ കുറച്ചു വർഷങ്ങളായി താരം തമിഴ് രാഷ്ട്രീയത്തിൽ താല്പര്യം കാണിക്കുന്നുണ്ടായിരുന്നു. ജയലളിതയുടെ മരണത്തിനു പിന്നാലെ ആർകെ നഗറിൽ നടന്ന ഉപതിരഞ്ഞെടുപ്പിൽ മത്സരിക്കാൻ ഇദ്ദേഹം ശ്രമിച്ചിരുന്നു. എന്നാൽ നാമനിർദേശ പത്രിക തള്ളിപ്പോയി.

ഇതിനിടെ വിശാൽ തന്റെ ആരാധക സംഘത്തിന്റെ പേര് ‘മക്കൾ നല ഇയക്കം’ (പൊതുജന നൻമയ്ക്കുള്ള സംഘം) എന്നാക്കി മാറ്റിയിരുന്നു. പ്രവർത്തനങ്ങൾ ഏകോപിപ്പിക്കാൻ ഓരോ ജില്ലയിലും പ്രവർത്തകരെ നിയോഗിച്ചു. പാർട്ടിയുടെ പേര് എത്രയും വേഗം പ്രഖ്യാപിച്ച ശേഷം 2026ലെ തിരഞ്ഞെടുപ്പിനെ നേരിടാനാണു നീക്കമെന്നും റിപ്പോർട്ടുണ്ട്.

അതേസമയം രാഷ്ട്രീയ പാർട്ടിയുടെ പേര് പ്രഖ്യാപിച്ചതിന് പിന്നാലെ സുപ്രധാന തീരുമാനങ്ങൾ നടൻ വിജയ് പങ്കുവെച്ചിരുന്നു. കരാർ ഒപ്പിട്ട ചിത്രങ്ങൾ പൂർത്തിയാക്കിയ ശേഷം അഭിനയം നിർത്തുമെന്നും മുഴുവൻ സമയവും രാഷ്ട്രീയത്തിന് വേണ്ടി മാറ്റി വെക്കുമെന്നും വിജയ് പറഞ്ഞു.

‘തമിഴക വെട്രി കഴകം’ എന്നാണ് വിജയ് നേതൃത്വം നൽകുന്ന രാഷ്ട്രീയ പാർട്ടിയുടെ പേര്. ആരാധക സംഘടനയായ വിജയ് മക്കൾ ഇയക്കം അംഗങ്ങളാണ് രാഷ്ട്രീയ പാർട്ടി രജിസ്റ്റർ ചെയ്യാൻ മുൻകൈ എടുത്തത്. രജിസ്ട്രേഷൻ പൂർത്തിയാക്കിയതിന് ശേഷമാണ് പാർട്ടിയുടെ പേര് പ്രഖ്യാപിച്ചത്.