തമിഴ്‌നാട് സ്വദേശി പൊന്നമ്പലമേട്ടിലെ പൂജ നടത്തിയ സംഭവം, കൂട്ട് നിന്ന് രണ്ട് ജീവനക്കാർ അറസ്റ്റിൽ പണം വാങ്ങിയെന്നും സംശയം

പത്തനംതിട്ട: അനധികൃതമായി വനംവകുപ്പിന്റെ പരിധിയിലുള്ള പൊന്നമ്പലമേട്ടിൽ കയറി തമിഴ്‌നാട് സ്വദേശിയായ നാരായണൻ പൂജനടത്തിയ സംഭവത്തിൽ രണ്ട് വനം വികസന കോർപ്പറേഷൻ ജീവനക്കാരെ അറസ്റ്റ് ചെയ്തു. സംഭവത്തിൽ നാരായണന് കൂട്ട് നിന്ന കെഎഫ്‌ഡിസി ഗവിയിലെ ജീവനക്കാരായ രാജേന്ദ്രൻ, സാബു എന്നിവരെയാണ് വനംവകുപ്പ് അറസ്‌റ്റ് ചെയ്‌‌തത്. കെഎഫ്ഡിസി ഗവി സൂപ്പർവൈസറാണ് രാജേന്ദ്രൻ. തോട്ടം തൊഴിലാളിയാണ് സാബു. ഇരുവരും നാരായണനിൽ നിന്ന് പണം കൈപ്പറ്റിയിട്ടുണ്ടോയെന്നും സംശയമുണ്ട്.

അതേസമയം അനധികൃതമായി അതിക്രമിച്ച് കയറിയതിന് വനംവകുപ്പ് നാരായണനെതിരെ കേസെടുത്തിട്ടുണ്ട്.
പച്ചക്കാനം ഫോറസ്‌റ്റ് സ്‌റ്റേഷനിലാണ് കേസ് രജിസ്‌റ്റർ ചെയ്‌തത്. ഇയാൾ മുൻപ് ശബരിമലയിൽ കീഴ്ശാന്തിയുടെ സഹായിയായി പ്രവർത്തിച്ചിട്ടുണ്ട്‌. സംഭവത്തിൽ പൊലീസ് മേധാവിയ്ക്കും വനംവകുപ്പ് മേധാവിയ്ക്കും പരാതി നൽകുമെന്ന് ദേവസ്വം ബോർഡ് വ്യക്തമാക്കിയിരുന്നു.

പൊന്നമ്പലമേട്ടിൽ മകരവിളക്ക് തെളിയിക്കുന്ന തറയിലിരുന്നാണ് നാരാണൻ പൂജ ചെയ്തത്. വനംവകുപ്പിന്റെ പൂർണ നിയന്ത്രണത്തിലുള്ള ഇടമാണിത്. ഇതിന്റെ ദൃശ്യങ്ങൾ പുറത്തുവന്നതോടെയാണ് പൂജ നടന്ന കാര്യം പുറത്തറിയുന്നത്. ദേവസ്വം ബോർഡിന്റെയടക്കം ഉന്നത ഉദ്യോഗസ്ഥരുള്ള വാട്സ്ആപ്പ് ഗ്രൂപ്പിൽ വീഡിയോ എത്തുകയായിരുന്നു.