വീണ്ടും ഭര്‍ത്താവ് തല്ലി, പൂനം പാണ്ഡെ ഗുരുതരാവസ്ഥയില്‍ ആശുപത്രിയില്‍, സാമിനെ പോലീസ് അറസ്റ്റ് ചെയ്തു

നടി പൂനം പാണ്ഡെ വീണ്ടും ഭര്‍തൃ പീഡനത്തിന് ഇരയായി. നടിയെ ആശുപത്രിയില്‍ പ്രവേശിപ്പിച്ചു. തുടര്‍ന്ന് നടിയുടെ പരാതിയില്‍ സാം ബോംബെയെ പോലീസ് അറസ്റ്റ് ചെയ്തു. ഇക്കുറി കാര്യമായ പരുക്കുകളേറ്റാണ് പൂനം ആശുപത്രിയില്‍ പ്രവേശിപ്പിക്കപ്പെട്ടതെന്നാണ് വിവരം. തലയ്ക്കും മുഖത്തിനും കണ്ണിനും ഗുരുതരമായി പരുക്കുണ്ട്. സംഭവത്തില്‍ അന്വേഷണം നടക്കുകയാണെന്ന് മുംബൈ പോലീസ് അറിയിച്ചു.

കഴിഞ്ഞ സെപ്റ്റംബര്‍ 11നാണ് പൂനം പാണ്ഡെയും സാം ബോംബെയും തമ്മില്‍ വിവാഹിതര്‍ ആകുന്നത്. വിവാഹ ശേഷം ഹണിമൂണിനായി ഗോവയ്ക്ക് പോയിരുന്നു. അവിടെ വെച്ച് ഭര്‍ത്താവ് ആക്രമിച്ചു എന്ന് കാട്ടി പൂനം പോലീസില്‍ പരാതി നല്‍കിയിരുന്നു. സാമിനെ അന്ന് പോലീസ് അറസ്റ്റ് ചെയ്യുകയും ചെയ്തിരുന്നു.

അവിടെ നിന്നും ജാമ്യം ലഭിച്ച് പുറത്തിറങ്ങിയ സാം ബോംബെയുമായി പൂനം വീണ്ടും ഒരുമിച്ചു ജീവിതം ആരംഭിച്ചു. ഭാര്യാ- ഭര്‍ത്താക്കന്മാര്‍ക്ക് ഇടയില്‍ ഇതൊക്കെ സ്വാഭാവികമാണെന്ന് പറഞ്ഞായിരുന്നു പൂനം വീണ്ടും ഭര്‍ത്താവിനെ സ്വീകരിച്ചത്. നീണ്ട നാളത്തെ പ്രണയത്തിന് ശേഷമാണ് പൂനം പാണ്ഡെയും സാം ബോബെയും വിവാഹിതരായത്.

സ്വന്തം അര്‍ധ നഗ്‌ന ചിത്രങ്ങളും നഗ്‌ന ചിത്രങ്ങളും സോഷ്യല്‍ മീഡിയയിലൂടെ പ്രചരിപ്പിച്ച് ശ്രദ്ധ നേടിയ നടിയാണ് പൂനം പാണ്ഡെ. അശ്ലീല ചിത്രങ്ങളിലെ നായികയായ പൂനത്തിന്റെ പല പരമാര്‍ശങ്ങളും നേരത്തെ വിവാദമായിരുന്നു. 2011 ല്‍ ഇന്ത്യ ലോകകപ്പ് നേടിയാല്‍ നഗ്‌നയായി ഓടും എന്ന് പറഞ്ഞത് വന്‍ വിവാദമായി. 2013 ല്‍ നാഷ എന്ന ചിത്രത്തിലൂടെ ബോളിവുഡ് സിനമയില്‍ പൂനം തുടക്കം കുറിച്ചു.