ഹോട്ടൽ പൂട്ടി, ഇനി അഭിനയത്തിൽ ശ്രദ്ധവെച്ച് പൂർണ്ണിമ

പൂർണ്ണിമ ആനന്ദിനെ അറിയാത്ത മലയാളികൾ ഉണ്ടാകില്ല. അധികം സിനിമകൾ ചെയ്തിട്ടില്ല. എന്നാൽ ചെയ്ത സിനിമകളിൽ മികച്ച കഥാപാത്രങ്ങൾ. സിനിമാപ്രേമികളുടെ മനസ്സിൽ സ്ഥാനമുറപ്പിക്കുന്ന നല്ല കഥാപാത്രങ്ങൾ ചെയ്യാൻ ഭാ​ഗ്യം ചെയ്ത നടി. വിവാഹശേഷം ഏറെ നാളായി സിനിമാ രം​ഗത്ത് നിന്ന് വിട്ട് നിന്ന പൂർണ്ണിമ സീരിയലിലൂടെ തിരിച്ചുവരവിന് ഒരുങ്ങുകയാണ്. സ്വാകാര്യ ചാനലിൽ സംപ്രേഷണം ചെയ്യുന്ന ‘നാമം ജപിക്കുന്ന വീടി’ലൂടെയാണ് പൂർണ്ണിമയുടെ പുനപ്രവേശം.

1999 ൽ മോഹൻലാൽ ചിത്രമായ ഒളിമ്പ്യൻ അന്തോണി ആദത്തിലെ ലില്ലി എന്ന കഥാപാത്രത്തിലൂടെയാണ് പൂർണ്ണിമ അഭിനയലോകത്തെത്തുന്നത്. പിന്നീട് ഗ്രാമഫോൺ, സ്വപ്നക്കൂട്, സേതുരാമയ്യർ CBI, ബസ് കണ്ടക്ടർ, നാദിയ കൊല്ലപ്പെട്ട രാത്രി, ചിന്താമണി കൊലക്കേസ് തുടങ്ങി ഒട്ടേറെ ചിത്രങ്ങളിൽ ചെറുതും വലുതുമായ കഥാപാത്രങ്ങൾ ചെയ്തു. തന്റെ അഭിനയത്തെക്കുറിച്ച് പൂര്ണ്ണിമ തന്നെ പറയുന്നത് ഇങ്ങനെയാണ്.

താനൊരു ഡയറ്ടേഴ്സ് ആക്ട്രസാണ്. സംവിധായകൻ ആ​ഗ്രഹിക്കുന്നത് കൊടുക്കാനാണ് ശ്രമിക്കുക. സിനിമയെ അപേക്ഷിച്ച് സീരിയലിൽ കുറച്ചു കൂടി സ്വാതന്ത്ര്യം കിട്ടുന്നുണ്ടെന്നും നടി പറയുന്നു. അഭിനയത്തിന്റെ ഇടവേളയിൽ ഭർത്താവും അഭിനേതാവുമായ ആനന്ദ് ഭാരതിയുമായിച്ചേർന്ന് ഹോട്ടൽ ബിസിനസ് നടത്തുകയായിരുന്നു പൂർണ്ണിമ. ചെന്നൈയിലായിരുന്നു വിവാഹശേഷം പൂർണ്ണിമ താമസിച്ച് വന്നത്, Ann & Amm എന്നായിരുന്നു സംരംഭത്തിന്റെ പേര്. പിന്നീട് തിരുവനന്തപുരം വട്ടിയൂർക്കാവിൽ ‘സെൻസീറോ’ എന്നൊരു ഇറ്റാലിയൻ റെസ്റ്റോറന്റ് നടത്തിയിരുന്നു. – ബിസിനസ് നന്നായി പോകുന്നുണ്ടായിരുന്നു. പക്ഷെ ബിസിനസ് നമ്മുടെ പ്രഷർ കൂട്ടുന്ന കാര്യമാണ്. അതുകൊണ്ട് തന്നെ ആരോ​ഗ്യത്തെ ബാധിച്ച് തുടങ്ങി. അതുകൊണ്ട് ഭർത്താവിന്റെ നിർദ്ദേശപ്രകാരമാണ് റെസ്റ്റോറന്റ് ഇപ്പോൾ ക്ലോസ് ചെയ്തത്. അഭിനയത്തിൽ കൂടുതൽ ശ്രദ്ധിക്കാനാണ് ഇപ്പോൾ ആലോചിക്കുന്നതെന്നും താരം പറയുന്നു.