ക്ഷേത്രമുറ്റത്ത് മൂത്രമൊഴിച്ചത് ചോദ്യംചെയ്‌തതിന് വിദ്യാർത്ഥിയെ കൊലപ്പെടുത്തിയ സംഭവം; പ്രതിയുടെ ലൈസൻസ് റദ്ദാക്കി

തിരുവനന്തപുരം : ക്ഷേത്രമുറ്റത്ത് മൂത്രമൊഴിച്ചത് ചോദ്യംചെയ്‌തതിന് കാട്ടക്കടയിൽ പത്താം ക്ലാസുകാരനെ കാറിടിച്ച് കൊന്ന സംഭവത്തിലെ പ്രതി പ്രിയരഞ്ജന്റെ ഡ്രൈവിങ് ലൈസൻസ് സ്ഥിരമായി റദ്ദാക്കി. സംഭവത്തിൽ മോട്ടോർ വെഹിക്കിൾ ഇൻസ്‌പെക്ടർ സമർപ്പിച്ച റിപ്പോർട്ടിനെ തുടർന്നാണ് നടപടി. വിദ്യാർത്ഥിയെ ക്രൂരമായി കൊലപ്പെടുത്തിയ പ്രതി പ്രിയരഞ്ജന്റെ ഡ്രൈവിംഗ് ലൈസൻസ് റദ്ദാക്കണമെന്നായിരുന്നു റിപ്പോർട്ടിലെ ശുപാർശ

ഇതിന്റെ അടിസ്ഥാനത്തിലാണ് തീരുമാനമെടുത്തതെന്ന് മോട്ടോർ വാഹന വകുപ്പ് അറിയിച്ചു. ഓഗസ്റ്റ് 30 നായിരുന്നു കേരളത്തെ നടക്കിയ ക്രൂര കൃത്യം നടന്നത്. ആദ്യ ഘട്ടത്തിൽ അപകട മരണമാണെന്ന് തെറ്റിദ്ധരിപ്പിക്കുകയായിരുന്നു. എന്നാൽ കൊലപാതകമാണെന്ന് തെളിയിക്കുന്ന സിസിടിവി ദൃശ്യങ്ങൾ പുറത്തു വന്നതോടെയാണ് പ്രതി കുടുങ്ങിയത്.

ഇതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് സത്യാവസ്ഥ പുറത്തുവന്നത്. നിർത്തിയിട്ടിരിക്കുകയായിരുന്ന കാർ, കുട്ടി സൈക്കിളിൽ കയറിയപ്പോൾ പ്രതി മുന്നോട്ടെടുത്ത് ഇടിച്ച് കൊലപ്പെടുത്തുകയായിരുന്നു. പ്രതിക്ക് കുട്ടിയോട് മുൻവൈരാഗ്യം ഉണ്ടായിരുന്നു. കുട്ടിയുടെ കുടുംബ ക്ഷേത്രത്തിന് മുന്നിൽ പ്രതി മൂത്രമൊഴിക്കുന്നത് കുട്ടി ചോദ്യം ചെയ്തിരുന്നു. ഇതിലുള്ള വൈരാഗ്യമാണ് കൊലപാതകത്തിൽ കലാശിച്ചത്. കൊലപാതകത്തിന് മൂന്ന് മാസം മുൻപായിരുന്നു സംഭവം.