ശപഥം നിറവേറ്റി ഷീബ, 40 ദിവസത്തെ കണ്ണീര്‍ പോരാട്ടത്തിന് അവസാനം, പൊന്നുവിന്റെ മൃതദേഹം മണ്ണോട് ചേര്‍ന്നു

പത്തനംതിട്ട;കോവിഡ് മഹാമാരിക്ക് ഇടയിലും വലിയ വെള്ളപ്പൊക്കത്തിനിടയിലും ഷീബയുടെ മനസ് കുലുങ്ങിയില്ല.തന്റെ പ്രിയതമന് നീതി നേടി കൊടുക്കണം.ഒടുവില്‍ ആ നീതി നേടി കൊടുത്ത് പ്രിയതമന്റെ ഭൗതിക ശരീരം മണ്ണോട് ചേരുകയും ചെയ്തു.40 ദിവസങ്ങള്‍ക്ക് മുമ്പ് വനപാലകരുടെ കസ്റ്റഡിയില്‍ ഇരിക്കെ മരിച്ച പടിഞ്ഞാറേ ചെരുവില്‍ പി പി മത്തായിയുടെ(പൊന്നു 41)മൃതദേഹമാണ് ഇന്നലെ സംസ്‌കരിച്ചത്.റീ പോസ്റ്റ്‌മോര്‍ട്ടത്തിന് ശേഷമായിരുന്നു കുടപ്പനക്കുളം സെന്റ് മേരീസ് ഓര്‍ത്തഡോക്‌സ് പള്ളിയില്‍ കോവിഡ് മാനദണ്ഡങ്ങള്‍ പാലിച്ച് അന്ത്യ ദര്‍ശനവും സംസ്‌കാര ചടങ്ങുകളും നടത്തിയത്.മത്തായിയുടെ മൃതദേഹം വീട്ടില്‍ എത്തിച്ചപ്പോള്‍ ആ കാഴ്ച കണ്ടു നിന്നവര്‍ക്ക് സഹിക്കാനായില്ല.ഭാര്യ ഷീബയും മക്കളായ സോനയും ഡോണയും പൊട്ടി കരയുകയായിരുന്നു.തങ്ങള്‍ക്ക് ഇനി ഒരു തുണയായി കൂട്ടായി ആരുണ്ട് എന്ന അവരുടെ ചോദ്യത്തിന് അവിടെ കേട്ടു നിന്നവര്‍ക്കും മറുപടി പറയാനാവുമായിരുന്നില്ല.ജൂലൈ 28ന് വനപാലകര്‍ കസ്റ്റഡിയില്‍ എടുത്ത പിപി മത്തായിയെ പിന്നീട് കുടുംബ വീടിന് സമീപമുള്ള കിണറില്‍ മരിതച്ച നിലയില്‍ കണ്ടെത്തുകയായിരുന്നു.എന്നാല്‍ മരണത്തില്‍ ദുരൂഹത ആരോപിച്ച് കുടുംബം രംഗത്തെത്തി.മാത്രമല്ല കസ്റ്റഡി മരണമാണിതെന്നും സിബിഐ അന്വേഷിക്കണമെന്നും അതുവരെ മൃതദേഹം സംസ്‌കരിക്കില്ലെന്നും ആയിരുന്നു കുടുംബത്തിന്റെ നിലപാട്.കഴിഞ്ഞ ദിവം സിബിഐ അന്വേഷണത്തിന് ഉത്തരവിടുകയും തുടര്‍ന്ന് സംസ്‌കാരം നടത്തുകയുമായിരുന്നു.സിബിഐ അന്വേഷണ സംഘം നടത്തിയ ദേഹപരിശോധനയില്‍ പൊലീസ് ഇന്‍ക്വസ്റ്റ് റിപ്പോര്‍ട്ടിലുള്ളതിനേക്കാള്‍ മുറിവുകള്‍ കണ്ടെത്തിയിരുന്നു.

കഴിഞ്ഞ ദിവസം മൃതദേഹം റീപോസ്റ്റ്‌മോര്‍ട്ടം നടത്തിയകിന് ശേഷം പത്തനംതിട്ടയിലെ സ്വകാര്യ ആശുപത്രി മോര്‍ച്ചറിയില്‍ സൂക്ഷിച്ചു.ഇന്നലെ രാവിലെ ഭാര്യ ഷീബയും ബന്ധുക്കളും മോര്‍ച്ചറിയില്‍ നിന്നും മൃതദേഹം ഏറ്റുവാങ്ങി.ഒട്ടേറെ നാട്ടുകാരും എത്തിയിരുന്നു.തുടര്‍ന്ന് വിലാപയാത്രയായി നാട്ടിലെത്തിച്ചു.മത്തായിയുടെ ചേതനയറ്റ ശരീരം കണ്ട് അമ്മ ഏലിയാമ്മ അലമുറയിട്ടു കരഞ്ഞു.ഷീബയും മക്കളായ സോണയും ഡോണയും കരഞ്ഞ് തളര്‍ന്ന നിലയില്‍ ആയിരുന്നു.