കേരളത്തിൽ ബിജെപി അഞ്ച് സീറ്റുകൾ നേടും, കുറ്റകൃത്യവും അഴിമതിയും കള്ളക്കടത്തും സിപിഎമ്മിന്റെ മുഖമുദ്ര : പ്രകാശ് ജാവദേക്കർ

ന്യൂഡൽഹി : കേരളത്തിൽ പാർലമെന്റ് തിരഞ്ഞെടുപ്പിൽ ബിജെപി കുറഞ്ഞത് അഞ്ച് സീറ്റെങ്കിലും വിജയിക്കുമെന്ന് പ്രകാശ് ജാവദേക്കർ എം പി. കുറ്റകൃത്യവും അഴിമതിയും കള്ളക്കടത്തും നിലവിലെ സംസ്ഥാന സർക്കാരിന്റെ മുഖമുദ്രയായി മാറി. സിപിഎം കേരളത്തിൽ തകർന്നടിയാൻ പോവുകാണെന്നും പ്രകാശ് ജാവദേക്കർ കൂട്ടിച്ചേർത്തു. കോൺഗ്രസിൽ നിന്നും ഇനിയും നേതാക്കൾ പാർട്ടിയിലേയ്ക്ക് ചേക്കേറിയാൽ അത്ഭുതമില്ലെന്നും അദ്ദേഹം പറഞ്ഞു.

. മോദി ഒറ്റത്തവണയുണ്ടായ അത്ഭുതമാണെന്നാണ് കേരളീയർ കരുതിയത്. കഴിഞ്ഞ പാർലമെന്റ് തിരഞ്ഞെടുപ്പിൽ കേരളീയർ രാഹുൽ ഗാന്ധി പ്രധാനമന്ത്രിയാകും എന്നാണ് പ്രതീക്ഷിച്ചത്. എന്നാൽ ഇത്തവണ നരേന്ദ്രമോദി തന്നെ പ്രധാനമന്ത്രിയായി തുടരുമെന്ന് എല്ലാവർക്കും അറിയാം. വോട്ട് വിഹിതത്തിലും വർദ്ധനവുണ്ടായിട്ടുണ്ട്.

പ്രധാനമന്ത്രി സംസ്ഥാനങ്ങളോട് പക്ഷഭേദമില്ലാതെയാണ് പെരുമാറുന്നത്. ജാതി-മത- രാഷ്ടീയ താത്പര്യങ്ങൾക്കതീതമായ അദ്ദേഹത്തിന്റെ പ്രവർത്തനം കേരള ജനതയും മനസിലാക്കും,​ ഇത് വരുന്ന തിരഞ്ഞെടുപ്പിൽ അനുകൂലമായി മാറുമെന്ന് പ്രകാശ് ജാവദേക്കർ പറഞ്ഞു. 100 കണക്കിന് ബിജെപി പ്രവർത്തകർക്ക് കേരളത്തിൽ ജീവൻ നഷ്ടമായിട്ടുണ്ട്. ബിജെപി പ്രവർത്തകർ സിപിഎമ്മിൽ നിന്ന് വെല്ലുവിളികൾ നേരിടുന്നുണ്ട്.

കൊച്ചി ബ്രഹ്മപുരം മാലിന്യ പ്ളാന്റ് സംബന്ധിച്ച വിവാദങ്ങളിൽ കേരളത്തിലെ സിപിഎമ്മിനും കോൺഗ്രസിനും തുല്യ പങ്കാളിത്തമുള്ളതായി പ്രകാശ് ജാവദേക്കർ ആരോപിച്ചു. മാലിന്യ പ്ളാന്റ് സംബന്ധിച്ച കൂടുതൽ അഴിമതിക്കഥകൾ പുറത്തു വരാനിരിക്കുന്നതേയുള്ളു. ബ്രഹ്മപുരത്തുണ്ടായത് എൽഡിഎഫ്-യുഡിഎഫ് കൂട്ടുകെട്ടാണെന്നും ആദ്ദേഹം പറഞ്ഞു.