പശുക്കുട്ടിക്ക് മൂളിപ്പാട്ട് പാടി കൊടുത്ത് കിന്നാരം പറഞ്ഞ് പ്രവീണ, വൈറലായി വീഡിയോ

മലയാളികളുടെ പ്രിയപ്പെട്ട നടിയാണ് പ്രവീണ. നിരവധി സിനിമകളിലും സീരിയലുകളിലും നടി അഭിനയിച്ചിട്ടുണ്ട്. ദൂരദര്‍ശനിലെ മ്യൂസിക് പ്രോഗ്രാമില്‍ അവതാരകയായിട്ടാണ് താരം തന്റെ കരിയര്‍ ആരംഭിച്ചിരിക്കുന്നത്. പിന്നീട് നടിയും സഹ നടിയുമായി അഭിനയ രംഗത്ത് നടി എത്തുകയായിരുന്നു. കളിയൂഞ്ഞാല്‍ എന്ന ചിത്രത്തിലൂടെയാണ് പ്രവീണ അഭിനയ രംഗത്ത് എത്തുന്നത്. ബിഗ്‌സ്‌ക്രീനില്‍ തിളങ്ങിയ സമയത്ത് തന്നെ മിനിസ്‌ക്രീനിലും പ്രവീണ ഒരു കൈ നോക്കി.

മേഘം, മൗനം, സ്വപ്‌നം തുടങ്ങി പ്രവീണ അഭിനയിച്ച ചിത്രങ്ങള്‍ എല്ലാം വന്‍ ഹിറ്റുകളായിരുന്നു. മലയാളത്തിന് പുറമെ തമിഴിലും തിളങ്ങി നില്‍ക്കുകയാണ് നടി. അഭിമുഖങ്ങളില്‍ പങ്കെടുത്താല്‍ യാതൊരു മടിയുമില്ലാതെ രണ്ടു വരി പാടുന്ന താരവുമാണ് പ്രവീണ. കൊച്ചിലെ തന്നെ പാട്ട് പഠിച്ചിട്ടുള്ള പ്രവീണയുടെ പുതിയ മൂളിപ്പാട്ടാണിപ്പോള്‍ ആരാധകര്‍ ഇരു കൈയ്യും നീട്ടി സ്വീകരിച്ചിരിക്കുന്നത്. മോഹന്‍ലാലിന്റെ സൂപ്പര്‍ ഹിറ്റ് ചിത്രമായ ധനത്തില്‍ കെ എസ് ചിത്ര പാടി മനോഹരമാക്കിയ ഗാനം പ്രവീണയും അതി ഗംഭീരമായാണ് ആലപിച്ചതെന്ന് ആരാധകര്‍ പറയുന്നു.

”ഒരു വളര്‍ത്തുമൃഗം ഉണ്ടാകുന്നതുവരെ ആരും സ്വയം കണ്ടെത്തുന്നില്ല. അതുപോലെ ഒരു മൃഗത്തോട് ദയ കാണിക്കുമ്പോള്‍ മനുഷ്യന് ഒന്നും നഷ്ടപ്പെടുന്നുമില്ല” എന്ന കുറിപ്പോടുകൂടെയാണ് തന്റെ പശുക്കുട്ടിയോട് കിന്നരിക്കുന്ന വീഡിയോ നടി ഇന്‍സ്റ്റഗ്രാമില്‍ പങ്കുവച്ചത്. പാട്ടിനുശേഷം ചക്കരേയെന്നുവിളിച്ചാണ് പശുക്കുട്ടിയോടുള്ള സ്‌നേഹം പ്രവീണ പങ്കുവച്ചിരിക്കുന്നത്. നിരവധി പേരാണ് പ്രവീണയുടെ പാട്ടിനും, മൃഗസ്‌നേഹത്തിനുമെല്ലാം ആശംസകളുമായെത്തിയിരിക്കുന്നത്.