നദിയിൽ പ്രീ-വെഡ്ഡിങ് ഫോട്ടോഷൂട്ട് വരനും വധുവും മുങ്ങിമരിച്ചു

പ്രീ വെഡ്ഡിംഗ്ഫോട്ടോഷൂട്ടുകൾ ഇന്ന് സർവസാധാരണമാണ്. ചിലത് സഭ്യതയുടെ അതിര്വരമ്പുകൾ വേദിക്കുമ്പോൾ ചിലത് മാന്യതയുടെ രൂപത്തിലുള്ളതാണ്. എന്നാൽ അത്തരമൊരു ഫോട്ടോഷൂട്ട് വരൻറെയും വധുവിൻറെയും ജീവനെടുത്തിരിക്കുകയാണ്. തലക്കാടിൽ കാവേരി നദിയിൽ ചെറുവള്ളം മറിഞ്ഞുണ്ടായ അപകടത്തിൽ ചന്ദ്രു (28), ശശികല (20) എന്നിവരാണ് മരിച്ചത്. ഇരുവരും കഴിഞ്ഞ അഞ്ചുവർഷമായി പ്രണയത്തിലായിരുന്നു. ഈ മാസം 22 നായിരുന്നു ഇരുവരുടെയും വിവാഹം നിശ്ചയിച്ചിരുന്നത്.

മൈസൂരുവിൽ നിന്ന് ചില ബന്ധുക്കൾക്കൊപ്പമാണ് ഇവർ തലക്കാട് എത്തിയത്. സമീപത്തെ ഒരു റിസോർട്ടിലെത്തി സംഘം ബോട്ട് ആവശ്യപ്പെട്ടിരുന്നുവെന്നും, എന്നാൽ റിസോർട്ടിലെ അതിഥികൾക്ക് മാത്രമാണ് യാത്രക്കായി ബോട്ട് നൽകുകയെന്ന് റിസോർട്ട് അധികൃതർ അറിയിച്ചു. തുടർന്നാണ് സമീപത്തുണ്ടായിരുന്നു ചെറുവള്ളത്തിൽ നദി കടക്കാൻ സംഘം തീരുമാനിച്ചത്.

തുടർന്ന് വള്ളത്തിൽ കയറിയ ദമ്പതികൾ ഫോട്ടോയ്ക്കായി പോസ് ചെയ്യുന്നതിനിടെയായിരുന്നു അപകടം. വഞ്ചിയിൽ നിന്ന് യുവതി കാലുതെറ്റി പുഴയിലേക്ക് വീഴുകയായിരുന്നു. യുവതിയെ രക്ഷിക്കാനായി ശ്രമിച്ച യുവാവും വഞ്ചി മറിഞ്ഞ് പുഴയിലേക്ക് വീണു. ഒഴുക്കിൽപ്പെട്ട ഇരുവരെയും കണ്ടെത്തുമ്പോഴും മരണം സംഭവിച്ചിരുന്നു.

ഇരുവർക്കും നീന്തൽ വശമുണ്ടായിരുന്നില്ല. ഫയർ ഫോഴ്‌സ് നടത്തിയ തെരച്ചിലിൽ തിങ്കളാഴ്ചയാണ് ഇവരുടെ മൃതദേഹങ്ങൾ കണ്ടെത്തിയത്. അപകടമുണ്ടാകാൻ സാധ്യതയുള്ള ഇത്തരം ചെറുവള്ളങ്ങളിൽ യാത്ര ചെയ്യരുതെന്ന് നേരത്തെ മുന്നറിയിപ്പ് നൽകിയിരുന്നതാണെന്ന് പൊലീസ് പറയുന്നു.