പിഞ്ചുകുഞ്ഞുങ്ങൾ വെന്തുമരിച്ച സംഭവം, അനുശോചനം രേഖപ്പെടുത്തി പ്രധാനമന്ത്രി

ന്യൂഡൽഹി : നവജാത ശിശുക്കൾ ഡൽഹിയിലെ വിവേക് ​​വിഹാറിലെ ആശുപത്രിയിലുണ്ടായ തീപിടിത്തത്തിൽ വീണ്ടുമറിച്ച സംഭവത്തിൽ അനുശോചനം രേഖപ്പെടുത്തി പ്രധാനമന്ത്രി നരേന്ദ്രമോദി. എക്സിലൂടെയാണ് അദ്ദേഹം അനുശോചിച്ചത്.

ഡൽഹിയിലെ ആശുപത്രിയിലുണ്ടായ തീപിടിത്തം വളരെയധികം ഹൃദയഭേദകമാണ്. കുഞ്ഞുങ്ങളുടെ കുടുംബത്തിന്റെ ദുഃഖത്തിൽ പങ്കുചേരുന്നു. പരിക്കേറ്റവർ എത്രയും വേഗം സുഖം പ്രാപിക്കാൻ പ്രാർത്ഥിക്കുന്നുവെന്ന് പ്രധാനമന്ത്രി എക്സിൽ കുറിച്ചു.

കഴിഞ്ഞ ദിവസം രാത്രിയാണ് ഡൽഹിയിലെ വിവേക് വിഹാർ ബേബി കെയർ ആശുപത്രിയിൽ തീപിടിത്തമുണ്ടായത്. അപകടത്തിൽ ഏഴ് നവജാത ശിശുക്കളാണ് പൊള്ളലേറ്റ് മരിച്ചത്. മൂന്ന് നില കെട്ടിടത്തിലായിരുന്നു തീപിടിത്തം. പരിക്കേറ്റ കുഞ്ഞുങ്ങൾ വെന്റിലേറ്ററിൽ തുടരുകയാണ്. ഓക്സിജൻ സിലിണ്ടറുകൾ തുടർച്ചയായി പൊട്ടിത്തെറിച്ചത് രക്ഷാപ്രവർത്തനത്തിന് തടസമായിരുന്നു.

രണ്ടാം നിലയിൽ തീപ്പടർന്നതോടെ ജീവനക്കാരുടെ ഇടപെടലിൽ മൂന്നാം നിലയിലുണ്ടായിരുന്ന കുട്ടികളെ രക്ഷിക്കാൻ സാധിച്ചു. എന്നാൽ മറ്റുകുട്ടികൾ മുറിക്കുള്ളിൽ തന്നെ കുടുങ്ങുകയായിരുന്നു.