പ്രധാനമന്ത്രിയുടെ റോഡ് ഷോയ്ക്ക് പാലക്കാട് ആവേശത്തുടക്കം, പുഷ്പവൃഷ്ടിയോടെയും വാദ്യമേളങ്ങളോടെയും പ്രധാനസേവകന് വരവേൽപ്പ്

പാലക്കാട്∙ പ്രധാനമന്ത്രി നരേന്ദ്ര മോദിയുടെ റോഡ്ഷോ പാലക്കാട് അഞ്ചുവിളക്കിൽനിന്നും ആരംഭിച്ചു. തുറന്ന വാഹനത്തിൽ സംസ്ഥാന അധ്യക്ഷൻ കെ.സുരേന്ദ്രനും പാലക്കാട്, പൊന്നാനി, മലപ്പുറം സ്ഥാനാർഥികൾക്കും ഒപ്പമാണ് റോഡ്ഷോ .പാതയ്ക്കിരുവശവും നിന്ന പ്രവർത്തകർ പുഷ്പവൃഷ്ടിയോടെയും വാദ്യമേളങ്ങളോടെയുമാണ് മോദിക്ക് വരവേൽപ്പ് നൽകിയത്.

പ്രധാനമന്ത്രിയുടെ സന്ദര്‍ശനത്തിന്റെ ഭാഗമായി 12 മണിവരെ പട്ടണത്തില്‍ ഗതാഗതനിയന്ത്രണമുണ്ട്. ജില്ലയിലെ വിവിധ ഭാഗങ്ങളില്‍നിന്നായി 50,000 പ്രവര്‍ത്തകര്‍ പരിപാടിക്കെത്തുമെന്ന് പാർട്ടി വൃത്തങ്ങൾ.

കോയമ്പത്തൂരിൽനിന്ന് ഹെലികോപ്റ്ററിൽ പാലക്കാട് മേഴ്സി കോളജ് ഗ്രൗണ്ടിൽ ഇറങ്ങിയ അദ്ദേഹത്തെ ബിജെപി കേരള പ്രഭാരി പ്രകാശ് ജാവഡേകർ, സംസ്ഥാന പ്രസിഡന്റ് കെ.സുരേന്ദ്രൻ, പാലക്കാട്, പൊന്നാനി മലപ്പുറം സ്ഥാനാർഥികളും ഘടകകക്ഷി സംസ്ഥാന നേതാക്കളും ചേർന്ന് സ്വീകരിച്ചു.

ഗ്രൗണ്ടിൽനിന്ന് കാറിൽ നഗരമധ്യത്തിലെ കോട്ടമൈതാനത്തെ അഞ്ചുവിളക്കിൽ എത്തുന്ന മോദി 10.30ന് റോഡ് ഷോ ആരംഭിക്കും. സുൽത്താൻപേട്ട വഴി ഹെഡ് പോസ്റ്റ് ഓഫിസ് പരിസരത്താണ് ഷോ സമാപിക്കുക. പൊതുസമ്മേളനം ഇല്ല. ശേഷം മേഴ്സി കോളജ് ഗ്രൗണ്ടിലെത്തുന്ന പ്രധാനമന്ത്രി തമിഴ്നാട്ടിലേക്ക് പോകും