കന്യാകുമാരിയിലെ വിവേകാനന്ദപ്പാറയിൽ ധ്യാനമാരംഭിച്ച് പ്രധാനമന്ത്രി നരേന്ദ്രമോദി

കന്യാകുമാരിയിലെ വിവേകാനന്ദപ്പാറയിൽ പ്രധാനമന്ത്രി നരേന്ദ്രമോദിയുടെ ധ്യാനം തുടങ്ങി. 45 മണിക്കൂർ നീണ്ട ധ്യാനത്തിനായാണ് അദ്ദേഹം കന്യാകുമാരിയിലെത്തിയത്. അവിടെ കന്യാകുമാരി ദേവിയെ പ്രതിഷ്ഠിച്ചിരിക്കുന്ന ഭ​ഗവതി അമ്മൻ ക്ഷേത്രത്തിൽ അദ്ദേഹം ദർശനം നടത്തി. ഇതിന് ശേഷമാണ് വിവേകാനന്ദപ്പാറയിലേക്ക് അദ്ദേഹം എത്തിയത്.

വിവേകാനന്ദ പ്രതിമയിലും ശ്രീരാമകൃഷ്ണ പരമഹംസരുടെ ചിത്രത്തിലും ശാരദാദേവി ചിത്രത്തിലും അദ്ദേഹം പുഷ്പാർച്ചന നടത്തി. ധ്യാനമണ്ഡപത്തിൽ ജൂൺ ഒന്ന് വരെ അദ്ദേഹം ധ്യാനത്തിലിരിക്കുമെന്നാണ് വിവരം. രണ്ട് മാസത്തെ തുടർച്ചയായ പ്രചാരണ റാലികൾ അവസാനിച്ചതോടെയാണ് രണ്ട് ദിവസത്തെ ധ്യാനത്തിനായി പ്രധാനമന്ത്രി കന്യാകുമാരിയിലെത്തിയത്. തെരഞ്ഞെടുപ്പ് പ്രചാരണങ്ങൾ അവസാനിക്കുന്ന ഘട്ടത്തിൽ അദ്ദേഹം ആത്മീയയാത്ര നടത്തുന്നത് പതിവാണ്.

2019ലെ പ്രചാരണങ്ങൾക്ക് ശേഷം കേദാർനാഥിലും 2014ൽ പ്രതാപ്​ഗഡിലും അദ്ദേഹം സന്ദർശനം നടത്തിയിരുന്നു. ഇതിന് തുടർച്ചയായാണ് അദ്ദേഹം 2024ൽ കന്യാകുമാരിയിലെത്തിയത്. പ്രധാനമന്ത്രിയുടെ സന്ദർശനത്തിന്റെ ഭാ​ഗമായി കനത്ത സുരക്ഷാ വലയത്തിലാണ് കന്യാകുമാരി. നാലായിരത്തിലധികം സുരക്ഷാ ഉദ്യോ​ഗസ്ഥരെയാണ് സ്ഥലത്ത് വിന്യസിച്ചിരിക്കുന്നത്.