ആടുജീവിതത്തിൽ വസ്ത്രമഴിച്ചു മാറ്റുന്ന രംഗം എന്തിനു ചെയ്തു? ഉത്തരവുമായി പൃഥ്വിരാജ്

മരുഭൂമിക്കഥകൾ ഒരുപാടു കണ്ട മലയാളിക്ക് മുന്നിലേക്ക് അതൊന്നുമല്ലാത്ത ജീവിതം പറഞ്ഞു തന്ന ചിത്രമാണ് പൃഥ്വിരാജ് നായകനായി ബ്ലെസി സംവിധാനം ചെയ്ത ‘ആടുജീവിതം’. മലയാളിയായ നജീബ് എന്നയാൾ വിദേശജോലി സ്വപ്നം കണ്ട് ഗൾഫിൽ എത്തി ചതിക്കപ്പെട്ട് അടിമക്ക് തുല്യമായ ജീവിതം നയിച്ച രണ്ടു വർഷങ്ങളെ ആധാരമാക്കി ബെന്യാമിൻ രചിച്ച ആടുജീവിതം നോവലിനെ ആസ്പദമാക്കിയുള്ള ചിത്രമാണിത്

പൂർണ്ണ ആരോഗ്യവാനായി നാട്ടിൽ നിന്നും ഗൾഫിൽ എത്തി അവിടുത്തെ എയർപോർട്ടിൽ കണ്ടെത്തുന്ന അറബിയാൽ വഞ്ചിതനായി ജീവിക്കേണ്ടി വരുന്ന നജീബിനെയാണ് പൃഥ്വിരാജ് അവതരിപ്പിച്ചത്. ചിത്രം മികച്ച പ്രതികരണവുമായി പ്രദർശനം തുടരുകയാണ്. ചിത്രത്തിലെ ഒരു രംഗം ചിത്രീകരിച്ചതിന്റെ അനിവാര്യതയെപ്പറ്റി പൃഥ്വിരാജ് വിശദീകരിക്കുന്ന വീഡിയോ സോഷ്യൽ മീഡിയയിൽ തരംഗമായി മാറിക്കഴിഞ്ഞു.

ആടുകളെയും ഒട്ടകത്തെയും മേച്ച് ജീവിക്കുന്ന വ്യക്തിയായി, ഭക്ഷണം ലഭിക്കാതെ, ശുദ്ധജലം ഉപയോഗിക്കാൻ അവസരം ലഭിക്കാതെ സ്വന്തം ഭാഷ പോലും മറന്നു പോകുന്ന വ്യക്തിയാണ് പൃഥ്വിരാജ് അവിസ്മരണീയമാക്കിയ നജീബ് എന്ന കഥാപാത്രം നീണ്ട നാളത്തെ മരുഭൂമി വാസത്തിനിടെ സ്വതന്ത്രമായി ജലം ഉപയോഗിക്കാൻ കിട്ടുന്ന അവസരം പ്രയോജനപ്പെടുത്തുന്ന നജീബ് സിനിമയിൽ ഒരിടത്തുണ്ട്. ഇതിൽ വിവസ്ത്രനായാണ് പൃഥ്വിരാജ് പ്രത്യക്ഷപ്പെടുന്നത്. ഇത്തരമൊരു രംഗം എന്തിനു ചെയ്യേണ്ടി വന്നു എന്ന് പൃഥ്വിരാജ് വിശദമാക്കി

ഒരു സംവിധായകന്റെ കാഴ്ചപ്പാടിനൊപ്പം യാത്ര ചെയ്യുക മാത്രമാണ് അഭിനേതാവ് ചെയ്യുന്നത്. അതിലൊരു ചാഞ്ചാട്ടം ഉണ്ടെന്നു കണ്ടാൽ നമ്മൾ പിറകോട്ടു ചുവടുവെക്കും. ലേസർ ഫോക്സുമായി പോകുന്ന ബ്ലെസി മുന്നിൽ ഉണ്ടായതും ആശയക്കുഴപ്പത്തിന് സാധ്യതയുണ്ടായില്ല…

കഥാനായകന്റെ ശരീരത്തിൽ സംഭവിച്ച മാറ്റം കണ്ടിട്ട് വേണം അയാൾ മരുഭൂമിജീവിതത്തിൽ എന്തുമാത്രം അനുഭവിച്ചു എന്ന് പ്രേക്ഷകർ മനസിലാക്കാൻ. വസ്ത്രം മുഴുവനായി അഴിച്ചുമാറ്റുന്ന രംഗം കണ്ട് ഇയാൾ ഇത്രമാത്രം ദുഃഖദുരിതങ്ങൾ അനുഭവിച്ചു എന്ന് ഒരു പ്രേക്ഷകന് മനസിലാക്കി നൽകുകയായിരുന്നു ലക്‌ഷ്യം എന്ന് പൃഥ്വിരാജ്

തന്റെ 25-ാം വയസിൽ പൃഥ്വിരാജ് വാക്കുകൊടുത്ത ചിത്രം റിലീസ് ചെയ്തത് പൃഥ്വിരാജിന്റെ 41-ാം വയസിലാണ്. അമല പോൾ നായികയായ ചിത്രത്തിൽ എ.ആർ. റഹ്മാൻ സംഗീതം നൽകിയിരിക്കുന്നു