നഴ്സറി അധ്യാപകന്‍റെ ഫോണിൽ കുഞ്ഞുങ്ങളുടെ സ്വകാര്യദൃശ്യങ്ങൾ, പുറത്തായത് അശ്ലീലസന്ദേശങ്ങൾ അയച്ചെന്ന യുവതിയുടെ പരാതിയിൽ മൊബൈൽ പരിശോധിച്ചപ്പോൾ

നെടുങ്കണ്ടം: നഴ്സറി അധ്യാപകന്‍റെ ഫോണിൽ കുഞ്ഞുങ്ങളുടെ സ്വകാര്യദൃശ്യങ്ങൾ കണ്ടെത്തി. യുവതിക്കും അമ്മയ്ക്കും അശ്ലീലസന്ദേശങ്ങൾ അയച്ച ആളുടെ മൊബൈൽ പരിശോധിച്ചപ്പോഴാണ് ഞെട്ടിക്കുന്ന തെളിവുകൾ പോലീസ് കണ്ടത്. ഇതേത്തുടർന്ന് നഴ്സറി സ്കൂൾ അധ്യാപകനെ അറസ്റ്റുചെയ്തു. വട്ടപ്പാറ സ്വദേശി ജോജു(27)വിനെയാണ് നെടുങ്കണ്ടം പോലീസ് പിടികൂടിയത്.

സഹപാഠിയായ യുവതിക്കും അമ്മയ്ക്കും അശ്ലീലദൃശ്യങ്ങൾ അയച്ചെന്ന പരാതിയിൽ നടന്ന അന്വേഷണത്തിലാണ് പ്രതിയുടെ ഫോണിൽ കുഞ്ഞുങ്ങളുടെ സ്വകാര്യദൃശ്യങ്ങൾ കണ്ടെത്തിയത്. മറ്റൊരു സംസ്ഥാനത്തെ സ്വകാര്യസ്കൂളിൽ എൽ.കെ.ജി., യു.കെ.ജി. വിദ്യാർഥികളെയാണ് ഇയാൾ പഠിപ്പിച്ചിരുന്നത്.
യുവതിയുടെ പരാതിയിൽ പോലീസ് സ്റ്റേഷനിലേക്ക് വിളിച്ചുവരുത്തി.

തുടർന്ന് ഫോൺ പരിശോധിച്ചപ്പോഴാണ് കുട്ടികളുടെ മുന്നൂറോളം വീഡിയോകളും 180 ചിത്രങ്ങളും കണ്ടെത്തിയത്. ഇയാൾ പഠിപ്പിക്കുന്ന കുട്ടികളുടെ സ്വകാര്യദൃശ്യങ്ങളാണ് മൊബൈലിൽ സൂക്ഷിച്ചിരുന്നത്. പാരാതിപ്പെട്ട യുവതിക്കും മറ്റ് പെൺകുട്ടികൾക്കും ഇയാൾ അശ്ലീലസന്ദേശങ്ങൾ അയച്ചിരുന്നതായും പോലീസ് കണ്ടെത്തി.