പല സംവിധായകരെയും ജയറാം കളിപ്പിച്ചിട്ടുണ്ട്, രാജസേനനുമായി പിരിയാനുണ്ടായ കാരണം പറഞ്ഞ് പ്രൊഡക്ഷൻ കൺട്രോളർ

ഒട്ടേറെ ഹിറ്റ് ചിത്രങ്ങളിലൂടെ പ്രേക്ഷകർക്ക് ഏറെ പ്രിയപ്പെട്ട കൂട്ടുകെട്ടായിരുന്നു സംവിധായകൻ രാജസേനനും- ജയറാമും. മേലേപ്പറമ്പിൽ ആൺവീട്, അനിയൻ ഭാവ ചേട്ടൻബാവ, സി.ഐ.ഡി ഉണ്ണികൃഷ്‌ണൻ തുടങ്ങി കനക സിംഹാസനം വരെ എത്തിനിൽക്കുമ്പോൾ ഇരുവരും ഒന്നിച്ച ഭൂരിഭാഗം സിനിമകളും സൂപ്പർഹിറ്റുകളാണ്. ജയറാം എന്ന നടനെ സൂപ്പർ താര പദവിയിലേക്ക് എത്തിക്കുന്നതിനും രാജസേനൻ എന്ന സംവിധായകൻ വഹിച്ച പങ്ക് വളരെ വലുതാണ്. എന്നാൽ അതേസമയം ഇരുവരും അകലുന്ന കാഴ്ച്ചയും മലയാള സിനിമ ലോകം കണ്ടതാണ്.
ഇപ്പോൾ രാജസേനനും ജയറാമും തമ്മിൽ പിരിയാനുണ്ടായ കാരണത്തെ കുറിച്ച്‌ തുറന്നു പറയുകയാണ് പ്രൊഡക്ഷൻ കൺട്രോളർ മണക്കാട് രാമചന്ദ്രൻ

മണക്കാട് രാമചന്ദ്രന്റെ വാക്കുകൾ:

പുതിയ സംവിധായകർക്ക് ഡേറ്റ് കൊടുക്കാതെ ജയറാം ഒരുപാട് പേരെ കറക്കിയിട്ടുണ്ട്. ചെറിയ സംവിധായകർക്ക് ഡേറ്റ് കൊടുക്കാതെ പറ്റിച്ചിട്ടുണ്ട്. ലാൽജോസ് കഥ പറയാൻ പോയപ്പോൾ ഡേറ്റ് കൊടുത്തില്ല. ഒരുപാട് പേരെ ചുമ്മാ നടത്തിയിട്ടുണ്ട്. ഈ ദിവസം തുടങ്ങാം എന്ന് പറയും. അയാള് വിശ്വസിച്ച്‌ പോകും. എന്നാൽ അവസാനം ഈ സമയത്ത് മറ്റൊരാൾക്ക് കൊടുത്തെന്ന് അറിയും.

രാജസേനൻ ആണ് ഒരു സമയത്ത് ജയറാമിനെ രക്ഷിച്ച്‌ നിർത്തിയത്. എല്ലാ പടങ്ങളും ഹിറ്റ് ആയിരുന്നു. രാജസേനന്റെ അടുത്ത് നിന്നും പോയാൽ വേറെ പടം ചെയ്യാം എന്ന ഉദ്ദേശം ജയറാമിന് വന്നിരിക്കും. ആ പടം വേണ്ട, ഈ പടം ആണ് മറ്റേതിനേക്കാൾ നല്ലത് എന്ന് പറഞ്ഞ് ജയറാമിനെ തെറ്റിക്കുന്ന ഓരോ ടീമുകൾ ഉണ്ടല്ലോ. സ്ഥിരം രാജസേനന്റെ സിനിമകൾ ചെയ്തു കൊണ്ടിരുന്നാൽ ഇങ്ങനെ ആയിപ്പോകും എന്ന് പറഞ്ഞ് ആക്കും. ജയറാമിന് അത് കേൾക്കേണ്ട ആവശ്യമില്ലായിരുന്നു.

രാജസേനനും അബദ്ധം പറ്റി. ജയറാമിനെ തന്നെ പിടിച്ച്‌ അങ്ങനെ നിന്നു. വേറെ നടൻമാരെ അന്വേഷിച്ച്‌ രാജസേനൻ പോയില്ല. ജയറാം ഇട്ടിട്ട് പോയപ്പോൾ ഇങ്ങേർക്ക് വേറെ പിടിയില്ലാതെ ആയി. വേറെ പടങ്ങൾ ചെയ്ത് നിന്നില്ല. നല്ല നടൻമാരെ പിന്നീട് കിട്ടിയില്ല. വീണ്ടും രാജസേനൻ ജയറാമിനെ കൊണ്ടുവന്നാൽ പഴയ കുപ്പിയിൽ കഷായം ഒഴിക്കുന്നത് പോലെ ആയിരിക്കും. രാജസേനൻ പുതുമുഖങ്ങളെ വെച്ച്‌ പടം ചെയ്താൽ ഹിറ്റ് ആകും. രാജസേനൻ അഭിനയിക്കാതെ, സിനിമയിൽ തന്നെ നിന്ന് നല്ല പടങ്ങൾ ചെയ്യാൻ കഴിയും.’