പുതുപ്പള്ളി ഉപതിരഞ്ഞെടുപ്പില്‍ സമദൂരം തന്നെ, പ്രചരിക്കുന്ന വാര്‍ത്തകള്‍ തെറ്റാണെന്ന് എന്‍എസ്എസ്

കോട്ടയം. ബിജെപിക്ക് പുതുപ്പള്ളി ഉപതിരഞ്ഞെടുപ്പില്‍ എന്‍എസ്എസ് പിന്തുണ പ്രഖ്യാപിച്ചെന്ന തരത്തില്‍ പ്രചരിക്കുന്ന വാര്‍ത്ത അടിസ്ഥാന രഹിതമാണെന്ന് എന്‍എസ്എസ് ജനറല്‍ സെക്രട്ടറി സുകുമാരന്‍ നായര്‍. എന്‍എസ്എസ് ഇറക്കിയ പ്രസ്താവനിലാണ് ഇക്കാര്യം പറയുന്നത്.

ചരിത്രത്തിലാദ്യമായി സമദൂരസിദ്ധാന്തം എന്‍എസ്എസ് ഉപേക്ഷിച്ചുവെന്നും ബിജെപിക്ക് പുതുപ്പള്ളി തിരഞ്ഞെടുപ്പില്‍ പിന്തുണ പ്രഖ്യാപിച്ചെന്നുമുള്ള വാര്‍ത്ത അടിസ്ഥാന രഹിതമാണെന്ന് എന്‍എസ്എസ് പറയുന്നു. പുതുപ്പള്ളി ഉപതിരഞ്ഞെടുപ്പില്‍ രാഷ്ട്രീയമായി എന്‍എസ്എസിന് സമദൂര നിലപാടാണെന്നും എന്‍എസ്എസ് പറയുന്നു.

എന്‍എസ്എസ് പ്രവര്‍ത്തകര്‍ക്ക് അവരുടെതായ രാഷ്ട്രീയമുണ്ടെന്നും അവര്‍ക്ക് അതില്‍ വിശ്വസിക്കുവാനും വോട്ട് ചെയ്യുവാനും അവകാശമുണ്ടെന്നും എന്‍എസ്എസ് പറയുന്നു. അതുകൊണ്ട് തിരഞ്ഞെടുപ്പില്‍ എന്‍എസ്എസ് ഏതെങ്കിലും രാഷ്ട്രീയ പാര്‍ട്ടിക്ക് പിന്തുണ നല്‍കുന്നതില്‍ അര്‍ഥമില്ലെന്നും എന്‍എസ്എസ് പ്രസ്താവനയില്‍ പറയുന്നു.