ഇന്ദിരാഭവനിൽ ഉമ്മൻ ചാണ്ടിയുടെ പൊതുദർശനത്തിനിടെ പോക്കറ്റടി, നിരവധി നേതാക്കൾക്ക് പേഴ്സ് നഷ്ടമായി

തിരുവനന്തപുരം : മുൻ മുൻമന്ത്രി ഉമ്മൻചാണ്ടിയുടെ ഭൗതിക ശരീരം ഇന്ദിരാഭവനിൽ പൊതുദർശനത്തിന് എത്തിച്ചതിനിടെ വൻ പോക്കറ്റടി നടന്നതായി പരാതി. തിക്കിനും തിരക്കിനും ഇടയിൽ നിരവധി പേരുടെ പഴ്‌സുകൾ നഷ്ടമായി. തിരിച്ചു കിട്ടിയതിലാകട്ടെ പണവും ഉണ്ടായിരുന്നില്ല. പ്രിയ നേതാവിനെ അവസാനമായി കാണാൻ നൂറുകണക്കിന് പേരാണ് ഇവിടെ എത്തിയത്. ഇതിൽ നേതാക്കൾ ഉൾപ്പടെയുള്ളവരുടെ പേഴ്സുകളാണ് നഷ്ടമായത്.

ആള്‍ക്കൂട്ടത്തില്‍ പേഴ്‌സ് നഷ്ടപ്പെട്ടെന്നുപറഞ്ഞ് മുഹമ്മദ് സഫര്‍ എന്നയാള്‍ മ്യൂസിയം പൊലീസ് സ്‌റ്റേഷനിലടക്കം പരാതി നല്‍കിയിരുന്നു. അന്വേഷണത്തിൽ പതിനഞ്ചോളം പേഴ്സുകൾ ഉപേക്ഷിക്കപ്പെട്ട നിലയിൽ ഇന്ദിരാഭവന് പുറത്തുനിന്ന് കിട്ടിയിട്ടുണ്ട്. പത്തോളം പേഴ്സുകൾ സ്റ്റേഷനിലും ലഭിച്ചിട്ടുണ്ട്. എന്നാൽ ഇതിലൊന്നിലും പണമുണ്ടായിരുന്നില്ല. പക്ഷേ തിരിച്ചറിയൽ കാർഡ് അടക്കമുള്ള രേഖകൾ ഒന്നും നഷ്ടമായിരുന്നില്ല.

കള്ളന്മാർ അവസരം മുതലെടുത്ത് മോഷണം നടത്തിയതാണെന്നാണ് പ്രാഥമിക നിഗമനം. എന്നാൽ
എത്രപേരുടെ പേഴ്സുകളാണ് നഷ്ടപ്പെട്ടതെന്ന് ഇപ്പോഴും വ്യക്തമായിട്ടില്ല. ആൾക്കൂട്ടത്തിൽ നഷ്ടപ്പെട്ടു എന്നുകരുതി ചിലർ പരാതി നൽകാൻ തയ്യാറായിട്ടുമില്ല. നിരവധി പേർക്ക് പഴ്സ് നഷ്ടമാകുകയും പണം എടുത്ത ശേഷം പഴ്‌സുകൾ ഉപേക്ഷിക്കപ്പെട്ട നിലയിൽ കണ്ടെത്തുകയും ചെയ്തതോടെയാണ് സംഭവത്തിലെ മോഷണ സാധ്യതയെക്കുറിച്ച് നേതാക്കൾക്കും സംശയം തോന്നിയത്.