നാവിക ഉദ്യോ​ഗസ്ഥർക്ക് ഖത്തറിൽ വധശിക്ഷ, പ്രതീക്ഷയോടെ രാജ്യത്തിന്റെ നയതന്ത്രനീക്കം

ഇന്ത്യൻ മുതിർന്ന നാവിക ഉദ്യോ​ഗസ്ഥരെ ഖത്തറിൽ വധശിക്ഷയ്ക്ക് വിധിച്ച സംഭവത്തിൽ രാജ്യത്തിന്റെ നയതന്ത്രനീക്കം പ്രതീക്ഷ നല്കുന്നത്. ഏകപക്ഷീയമായി നടത്തിയ വധശിക്ഷ പ്രഖ്യാപനത്തെ അം​ഗീകരിക്കില്ലായെന്ന് ഇന്ത്യ പറഞ്ഞിരുന്നു. ഞെട്ടിപ്പിക്കുന്ന കോടതി വിധിയെന്ന് വിദേശകാര്യ മന്ത്രാലയം .

ഖത്തർ നാവികസേനയ്ക്കായി ഇറ്റാലിയൻ കമ്പനി നിർമിക്കുന്ന അന്തർവാഹിനി സംബന്ധിച്ച വിവരങ്ങൾ ഇസ്രയേലിനു ചോർത്തിക്കൊടുത്തുവെന്ന ആരോപണത്തിലാണ് മലയാളി ഉൾപ്പെടെ 8 ഇന്ത്യക്കാരെ രഹസ്യാന്വേഷണ വിഭാഗം വീടുകളിൽനിന്ന് രാത്രിയിൽ പിടികൂടിയത്.

തിരുവനന്തപുരം സ്വദേശിയെന്നു കരുതുന്ന രാഗേഷ് ഗോപകുമാർ, പൂർണേന്ദു തിവാരി, നവ്തേജ് സിങ് ഗിൽ, ബിരേന്ദ്ര കുമാർ വർമ, സുഗുനകർ പകാല, സഞ്ജീവ് ഗുപ്ത, അമിത് നാഗ്പാൽ, സൗരഭ് വസിഷ്ഠ് എന്നിവർക്ക് പിന്നീട് ‘കോർട്ട് ഓഫ് ഫസ്റ്റ് ഇൻസ്റ്റൻസ്’ വധശിക്ഷ വിധിയ്ക്കുകയും ചെയ്തു.

8 പേരും ഇന്ത്യൻ നാവികസേനയിൽനിന്നു വിരമിച്ചശേഷം ദോഹയിലെ അൽ ദഹ്റ ഗ്ലോബൽ ടെക്നോളജീസ് ആൻഡ് കൺസൽറ്റൻസി സർവീസസ് എന്ന സൈനിക പരിശീലന കമ്പനിയിൽ പ്രവർത്തിച്ചിരുന്നവരാണ്. അന്നുമുതൽ മാസങ്ങളോളം ഏകാന്ത തടവിലായിരുന്നു. ഇപ്പോൾ വധശിക്ഷയും. ഇവരെ ജയിലിൽ അടച്ചതെന്നതിന്റെ കൂടുതൽ വിവരങ്ങൾ അടുത്തിടെവരെ കുടുംബങ്ങളോടു വെളിപ്പെടുത്തിയിരുന്നില്ല.

കമ്പനിയുടെ ചീഫ് എക്സിക്യൂട്ടീവ് ഓഫിസർ ഖാമിസ് അൽ നജ്മിക്കുമെതിരെയും സമാന കുറ്റം ആരോപിക്കപ്പെട്ടിരുന്നു.എന്നാൽ ഏതാനും മാസം കഴിഞ്ഞ് നജ്മിക്കു ജാമ്യം ലഭിച്ചെങ്കിലും ഇന്ത്യക്കാരുടെ ജാമ്യാപേക്ഷ തള്ളി. അതേസമയം, ഒരേ രംഗത്തു പ്രവർത്തിക്കുന്ന മറ്റൊരു കമ്പനി നടത്തിയ പകവീട്ടലാണെന്ന അഭ്യൂഹവും ഉയർന്നിട്ടുണ്ട്.