പ്രചരിക്കുന്നത് വ്യാജപ്രചരണങ്ങൾ, സാമ്പത്തിക പ്രശ്‌നങ്ങളില്ല: രാഘവൻ

നടൻ രാഘവനും മകൻ ജിഷ്ണുവും പ്രേക്ഷകർക്ക് പ്രീയപ്പെട്ടവരാണ്. നമ്മൾ എന്ന സിനിമയിലൂടെയാണ് ജിഷ്ണു രാഘവൻ ശ്രദ്ധിക്കപ്പെടുന്നത്. മലയാളികൾക്കിന്നും നിഷ്കളങ്കമായ പുഞ്ചിരിയാണ് ജിഷ്ണു. സിനിമയിൽ സജീവമായിരുന്ന കാലത്താണ് ജിഷ്ണുവിനെ അർബുദം കീഴടക്കുന്നത്. ആദ്യം തൊണ്ടയിൽ ബാധിച്ച അർബുദം നീക്കം ചെയ്തു. പിന്നാലെ ശ്വാസകോശത്തിലേയ്ക്ക് കൂടി അത് വ്യാപിക്കുകയായിരുന്നു. ജിഷ്ണു അവതരിപ്പിച്ച കഥാപാത്രങ്ങൾക്കും, രോഗശയ്യയിലും നൽകിയ പോസിറ്റീവ് എനർജ്ജിയ്ക്കും എന്നും പ്രേക്ഷക മനസ്സിൽ സ്ഥാനമുണ്ട്. ജിഷ്ണുവിന്റെ മരണശേഷം രാഘവന്റെ കുടുംബം കടന്നുപോകുന്നത് ദയനീയമായ അവസ്ഥയിലൂടെയാണെന്ന വാർത്തകൾ പ്രചരിച്ചിരുന്നു.

ജീവിക്കാൻ നിവർത്തിയില്ലാതെ അവസരങ്ങൾ തേടി അലയുന്നുവെന്ന വാർത്തയോട് പ്രതികരിച്ച്‌ നടൻ രാഘവൻ രം​ഗത്തെത്തി. എനിക്ക് ആവശ്യത്തിന് സിനിമകൾ ഉണ്ട്. ആരുടെയും കാരുണ്യത്തിലല്ല ഞാൻ ജീവിക്കുന്നത്, പ്രചരിക്കുന്ന വ്യാജ വാർത്തകളിൽ ദുഃഖമുണ്ടെന്നും രാഘവൻ പറഞ്ഞു.

രാഘവന്റെ വാക്കുകൾ: വ്യജ പ്രചരണങ്ങളിൽ കടുത്ത വിഷമമുണ്ട്. ഒരു സെയ്ൽഫ് മെയ്ഡ് വ്യക്തിയാണ് ഞാൻ. ആരുടെയും കാരുണ്യത്തിലല്ല ജീവിക്കുന്നത്. ജീവിതത്തിൽ ഒരുപാട് പ്രതിസന്ധികൾ ഉണ്ടായിട്ടുണ്ടെങ്കിലും അതെല്ലാം തരണം ചെയ്യാൻ സാധിച്ചു. ഈ പ്രായത്തിലും ഞാൻ ജോലി ചെയ്യുന്നു. എന്റെ മക്കളെപ്പോലും ഞാൻ എന്റെ കാര്യങ്ങൾക്കായി ആശ്രയിക്കാറില്ല.

നിലവിൽ തെലുങ്കിൽ പ്രഭാസിനൊപ്പം ഒരു സിനിമ ചെയ്യുന്നുണ്ട്. പ്രഭാസിന്റെ മുത്തച്ഛന്റെ വേഷത്തിലാണ് അഭിനയിക്കുന്നത്. വിനയന്റെ പത്തൊൻപതാം നൂറ്റാണ്ടിലും അഭിനയിച്ചു. പിന്നെ ഒരുപിടി മലയാള ചിത്രങ്ങളിലും ഇപ്പോൾ അഭിനയിച്ചു വരുന്നു. ഞാൻ നായകനായ ഒരു സിനിമയും വരാനുണ്ട്. ഗോകുലം ഗോപാലനാണ് ചിത്രം നിർമിക്കുന്നത്. എനിക്ക് നിലവിൽ യാതൊരു സാമ്പത്തിക പ്രശ്‌നങ്ങളുമില്ല. എനിക്ക് പറ്റാവുന്നേടത്തോളം കാലം അഭിനയിക്കും.