10 വർഷം ഒറ്റമുറിയിൽ ജീവിച്ച റഹ്മാനും സജിതക്കും കുഞ്ഞു ജനിച്ചു

ഒരു പതിറ്റാണ്ട് പുറം ലോകമറിയാതെ ഒറ്റമുറിയിൽ കഴിഞ്ഞ അയിലൂർ കാരക്കാട്ടുപറമ്പ് സ്വദേശികളായ റഹ്‌മാൻ-സജിത ദമ്പതിമാർക്ക് കുഞ്ഞു ജനിച്ചു. ജൂൺ ആറിന് പാലക്കാട് ജില്ലാ ആശുപത്രിയിലായിരുന്നു പ്രസവം.

റിസ്‍വാൻ എന്നാണ് കുഞ്ഞിന് പേരിട്ടിരിക്കുന്നത്. 2010 ഫെബ്രുവരിയിലാണ് റഹ്‌മാനോടൊപ്പം ജീവിക്കുന്നതിനായി, സമീപവാസികൂടിയായ പതിനെട്ടുകാരി സജിത വീടുവിട്ടിറങ്ങിയത്. ഇലക്‌ട്രിക്കൽ ജോലിയും പെയിന്റിങും ചെയ്യുന്ന റഹ്‌മാൻ, വീട്ടുകാരോടോ നാട്ടുകാരോ അറിയാതെ തന്റെ വീട്ടിലെ ഒരു കുടുസ്സുമുറിയിൽ പത്തുവർഷത്തിലേറെ സജിതയെ പാർപ്പിച്ചു.

2021 മാർച്ചിൽ ഇവർ ആരോരുമറിയാതെ വിത്തനശ്ശേരിക്കുസമീപം വാടകവീട്ടിലേക്കുമാറി. ഇതേത്തുടർന്ന്, വീട്ടുകാർ റഹ്‌മാനെ കാണാനില്ലെന്നു പോലീസിൽ പരാതി നൽകി. ഇതിനിടെ, റഹ്‌മാനെ സഹോദരൻ നെന്മാറയിൽവെച്ചു കാണുകയും പോലീസിൽ വിവരമറിയിക്കുകയുംചെയ്തു.

തുടർന്നു നടന്ന അന്വേഷണത്തിലാണ് പ്രണയ സാഫല്യത്തിനായുള്ള പതിറ്റാണ്ടിന്റെ ഒളിവു ജീവിത ചരിത്രം പുറം ലോകമറിഞ്ഞത്. 2021 ഓഗസ്റ്റിലായിരുന്നു ഇത്. സജിതയെ കാണാനില്ലെന്ന് 2010-ൽത്തന്നെ അവരുടെ വീട്ടുകാർ പോലീസിൽ പരാതി നൽകിയിരുന്നു.

2021 സെപ്‌റ്റംബർ 15-ന് നിയമപരമായി വിവാഹം രജിസ്റ്റർചെയ്ത ശേഷം രണ്ടു വർഷമായി വാടകയ്ക്കാണ് ഇവർ താമസിച്ചുവരുന്നത്. ഗർഭ കാലത്തിന്റെ അവസാന സമയത്ത് സജിതയുടെ വീട്ടിലായിരുന്നു.