പി.സി ജോര്‍ജ് എനിക്ക് വളരെ ഇഷ്ടമുള്ള, ആഗ്രഹമുള്ള വ്യക്തിയാണ്, രാഹുല്‍ ഈശ്വര്‍ പറയുന്നു

കോഴിക്കോട്: വിദ്വേഷ പ്രസംഗത്തിന്റെ പേരില്‍ അറസ്റ്റിലായ പിസി ജോര്‍ജിനെ 14 ദിവസത്തേക്ക് കോടതി റിമാന്‍ഡ് ചെയ്തിരുന്നു. ഇപ്പോള്‍ പിസി ജോര്‍ജിനെയും മകന്‍ ഷോണ്‍ ജോര്‍ജിനെയും കുറിച്ച് രാഹുല്‍ ഈശ്വര്‍ പറഞ്ഞ വാക്കുകളാണ് ശ്രദ്ധേയമാകുന്നത്. പി.സി ജോര്‍ജും ഷോണും തനിക്ക് വളരെ പ്രിയപ്പെട്ടവരാണെന്ന് രാഹുല്‍ പറഞ്ഞു. അവര്‍ കാരണമാണ് ശബരിമല പ്രക്ഷോഭം ഈ രീതിയില്‍ വളര്‍ന്നത് എന്നും രാഹുല്‍ വ്യക്തമാക്കി.

‘പി.സി ജോര്‍ജ് എനിക്ക് വളരെ ഇഷ്ടമുള്ള, ആഗ്രഹമുള്ള വ്യക്തിയാണ്. അദ്ദേഹത്തെ എനിക്ക് ഇന്നലെയും ഇഷ്ടമാണ്, ഇന്നും ഇഷ്ടമാണ്. നാളെയും ഇഷ്ടമായിരിക്കും. പി.സി ജോര്‍ജും ഷോണും എനിക്ക് വളരെ പ്രിയപ്പെട്ടവരാണ്. അവര്‍ കാരണമാണ് ശബരിമല പ്രക്ഷോഭം ഈ രീതിയില്‍ വളര്‍ന്നത്. അവരാണ് എന്നെ ഇത്രയധികം സഹായിച്ചത്.”- രാഹുല്‍ വെളിപ്പെടുത്തി.

പ്രവാചകന്റെ പേര് പറയുമ്പോള്‍ മുഹമ്മദ് നബി സ്വല്ലല്ലാഹു അലൈഹിവസല്ലം എന്ന് എടുത്തുപറയാന്‍ ശ്രദ്ധകാണിക്കുന്ന, ആര്‍ജവം കാണിക്കുന്ന പി.സി ജോര്‍ജിനെയാണ് എനിക്ക് കൂടുതല്‍ ഇഷ്ടം. പി.സി ജോര്‍ജ് പോപുലര്‍ ഫ്രണ്ടിന്റെ വേദിയില്‍ പോകുകയും അവരുടെകൂടി പിന്തുണയോടു കൂടി തെരഞ്ഞെടുപ്പിനെ നേരിടുകയും ചെയ്തയാളാണെന്നും രാഹുല്‍ ചൂണ്ടിക്കാട്ടി.

‘ക്രിസ്ത്യാനികളുടെ അടിസ്ഥാനപരമായ ആശങ്ക അവര്‍ 21 ശതമാനമായിരുന്നു. ഇപ്പോള്‍ പതിനെട്ടര ശതമാനമായി. ഇനിയും കുറഞ്ഞാല്‍ സമൂഹത്തിലുള്ള സ്വീകാര്യതയും സ്വാധീനവും കുറഞ്ഞുപോകുമെന്ന സങ്കോചമാണ്. ഹിന്ദുക്കളുടെ മനസിലുള്ള ആശങ്ക, 50 വര്‍ഷം മുന്‍പ് ഞങ്ങള്‍ 63 ശതമാനമായിരുന്നു. 61 മുതല്‍ 63 വരെ. ഇപ്പോള്‍ അത് 54 മുതല്‍ 55 ശതമാനം വരെയൊക്കെയായി കുറഞ്ഞുപോയി. ഇതിനു കാരണം മുസ്ലിം സമൂഹമാണെന്ന തെറ്റിദ്ധാരണയാണ്. ഇതുകൊണ്ടാണ് ലൗ ജിഹാദും ലാന്‍ഡ് ജിഹാദും പോലുള്ള കാര്യങ്ങളെല്ലാം വരുന്നത്.’

അനന്തപുരി ഹിന്ദുമഹാസമ്മേളനത്തിന്റെ സംഘാടനത്തിലെ മിക്ക ആളുകളെയും തനിക്ക് നേരിട്ട് അറിയാമെന്നും രാഹുല്‍ ഈശ്വര്‍ പറഞ്ഞു. പരിപാടിയിലേക്ക് തന്നെക്കൊണ്ട് കഴിയുന്ന അതിഥികളെ സംഘടിപ്പിച്ചുകൊടുക്കുകയും ചെയ്തിട്ടുണ്ട്. എല്ലാവരും തന്റെ സുഹൃത്തുക്കളാണെന്നും അതിനാല്‍ എല്ലാവരെയും ബഹുമാനവുമാണെന്നും രാഹുല്‍ കൂട്ടിച്ചേര്‍ത്തു.