രാഹുൽ ഗാന്ധിയെ മാവോയിസ്റ്റ് ചിന്ത ബാധിച്ചിരിക്കുന്നു – രവിശങ്കർ പ്രസാദ്

ന്യൂഡൽഹി∙ ഇന്ത്യയിൽ ജനാധിപത്യം പുനഃസ്ഥാപിക്കാൻ യുഎസും യൂറോപ്പും ഇടപെടണമെന്ന രാഹുൽ ഗാന്ധി പറഞ്ഞത് രാജ്യത്തെ അപമാനിക്കലാണെന്നു ബിജെപി വക്താവ് രവിശങ്കർ പ്രസാദ്. ഇന്ത്യയുടെ ജനാധിപത്യത്തെയും ഭരണസംവിധാനത്തെയും പാർലമെന്റിനെയും രാഷ്ട്രീയ സംവിധാനത്തെയും ജുഡീഷ്യൽ സംവിധാനത്തെയും നാണംകെടുത്തുന്ന പരാമർശമാണ് രാഹുൽ നടത്തിയിരിക്കുന്നത് – രവിശങ്കർ പ്രസാദ് പറഞ്ഞു.

‘ഇന്ത്യൻ ജനാധിപത്യം പുനഃസ്ഥാപിക്കാൻ അമേരിക്കയും യൂറോപ്പും ഇടപെടണമെന്ന രാഹുൽ ഗാന്ധിയുടെ നിരുത്തരവാദപരമായ പരാമർശത്തിൽ സോണിയ ഗാന്ധിയും ഖർഗെയും അവരുടെ നിലപാടുകൾ വ്യക്തമാകാണാമെന്നും, രാഹുലിന്റെ പരാമർശത്തെ പിന്തുണയ്ക്കുന്നുണ്ടോ എന്ന് വ്യക്തമാക്കണമെന്നും ഇല്ലെങ്കിൽ തള്ളിപ്പറയണമെന്നും’ രവിശങ്കർ പ്രസാദ് ആവശ്യപെട്ടിട്ടുണ്ട്.

യുഎസിനും യൂറോപ്പിനും വിപണിയും പണവും ലഭിക്കുന്നതിനാൽ ഇന്ത്യയിൽ ജനാധിപത്യം പുനഃസ്ഥാപിക്കാൻ അവർ വേണ്ടത്ര ശ്രമിക്കുന്നില്ലെന്നായിരുന്നു ലണ്ടനിലെ പരിപാടിയിൽ രാഹുൽ പറഞ്ഞിരിക്കുന്നത്. ആർഎസ്എസ് മൗലികവാദ – ഫാഷിസ്റ്റ് സംഘടനയാണെന്നും രാഹുൽ വിമർശിച്ചിരുന്നു. ‘

രാജ്യത്തെ ജനാധിപത്യ സ്വഭാവം പൂർണമായും മാറി. അതിന്റെ കാരണം ആർഎസ്എസ് എന്നു പേരുള്ള ഒറ്റ സംഘടനയാണ്. മൗലികവാദവും ഫാഷിസവും ഉയർത്തിപ്പിടിക്കുന്ന ഈ സംഘടന ഇന്ത്യയിലെ എല്ലാ സ്ഥാപനങ്ങളും കയ്യടക്കി. മുസ്‌ലിം ബ്രദർഹുഡിന്റെ മാതൃകയിലുള്ള ഒരു രഹസ്യ സമൂഹമെന്ന് ആർഎസ്എസിനെ വിളിക്കാം’ – രാഹുൽ പറഞ്ഞിരുന്നു.

ആർഎസ്എസിനെതിരായ രാഹുലിന്റെ പരാമർശത്തെയും രവിശങ്കർ പ്രസാദ് വിമർശിച്ചിട്ടുണ്ട്. ‘ആർഎസ്എസ് ഒരു ദേശീയ സംഘടനയാണ്. ഇവിടെ ഇരിക്കുന്നവരെല്ലാം സ്വയംസേവകരാണെന്നതിൽ അഭിമാനം കൊള്ളുന്നവരാണ്. രാഹുൽ ഗാന്ധിയെ മാവോയിസ്റ്റ് ചിന്ത ബാധിച്ചിരിക്കുകയാണ്’ – രവിശങ്കർ പ്രസാദ് പറഞ്ഞു.