രാഹുലിനും രഞ്ജിത്തിനും അച്ഛനമ്മമാർ ഉറങ്ങുന്ന മണ്ണിൽ വീടായി

അച്ഛനമ്മമാർ ഉറങ്ങുന്ന മണ്ണിൽ തന്നെ രാഹുലിനും അനുജൻ രഞ്ജിത്തിനും സ്വന്തം വീടായി. വീടിന്റെ ഗൃഹപ്രവേശം ഈ മാസം നടക്കും. ചാലക്കുടി ആസ്ഥാനമായുള്ള ‘ഫിലോകാലിയ’ സന്നദ്ധസംഘടനയുടെ സാമ്പത്തിക സഹായത്തോടെയാണ് വീട് ഇവർ നിർമ്മിച്ചത്.

കോടതി ഉത്തരവിനെ തുടർന്ന് താത്കാലിക കുടിൽ പൊളിച്ചുനീക്കാനെത്തിയവർക്ക് മുന്നിൽ പെട്രോളൊഴിച്ച് ജീവനൊടുക്കിയ അതിയന്നൂർ പഞ്ചായത്തിലെ പോങ്ങിൽ നെട്ടത്തോട്ടം ലക്ഷംവീട് കോളനിയിൽ രാജന്റെയും അമ്പിളിയുടെയും മക്കളാണ് രാഹുലും രഞ്ജിത്തും. 2020 ഡിസംബർ 22-നായിരുന്നു ആ സംഭവം.

സ്വന്തമായി വീടും സ്ഥലവുമില്ലാത്ത രാജനും കുടുംബവും നെട്ടത്തോട്ടം കോളനിയിലെ അവകാശികളില്ലെന്ന് കരുതിയ സ്ഥലത്ത് കുടിൽകെട്ടി താമസിക്കുകയായിരുന്നു. എന്നാൽ അയൽവാസിയായ സ്ത്രീ ഈ സ്ഥലത്തിൽ അവകാശമുന്നയിച്ച് കോടതിയെ സമീപിച്ചു. തുടർന്നാണ് കോടതി ഉത്തരവുമായി രാജനെയും കുടുംബത്തെയും ഒഴിപ്പിക്കാനെത്തിയത്. കീഴ്‌ക്കോടതി ഉത്തരവിനെതിരേ രാജൻ ഹൈക്കോടതിയിൽനിന്ന് സ്റ്റേയും വാങ്ങിയിരുന്നു. എന്നാൽ ഇതിന്റെ പകർപ്പ് ഒഴിപ്പിക്കാനെത്തിയവർക്ക് മുന്നിൽ ഹാജരാക്കാൻ കഴിയാത്തതിനെ തുടർന്നാണ് അവർക്ക് ജീവനൊടുക്കേണ്ടിവന്നത്.

ചാലക്കുടി കേന്ദ്രീകരിച്ചു പ്രവർത്തിക്കുന്ന ‘ഫിലോകാലിയ’ എന്ന സന്നദ്ധ സംഘടനയാണ് രാഹുലിനും രഞ്ജിത്തിനും സഹായവുമായെത്തിയത്. ‘ഫിലോകാലിയ’ ചെയർമാൻ മാരിയോ ജോസഫിന്റെ സാന്നിധ്യത്തിൽ ഈ മാർച്ചിലാണ് വീടിന് തറക്കല്ലിട്ടത്. മൂത്ത മകൻ ആർ രാഹുൽ രാജിന് നെല്ലിമൂട് സർവീസ് സഹകരണ ബാങ്കിൽ സർക്കാർ ജോലി നൽകിയിരുന്നു.